Դանակահարություն՝ Վանաձորում. տուժածի մայրը հայտնել է, որ դանակահարողն իրենց բակից է

ԵՐԵՎԱՆ, ՄԱՅԻՍԻ 22, 24News

դանալ

2020 թ. մայիսի 16-ին՝ ժամը 00.30-ին, Վանաձորի բժշկական կենտրոնից հաղորդում է ստացվել այն մասին, որ կրծքավանդակի և գոտկային շրջանի ծակած-կտրած թափանցող վերք ախտորոշմամբ բուժօգնության է դիմել Վանաձոր քաղաքի 27-ամյա բնակիչ:

Նույն օրը 27-ամյա բնակչի մայրը ՀՀ ոստիկանությունում հաղորդում է ներկայացրել այն մասին, որ 2020 թ. մայիսի 15-ին՝ ժամը 21.35-ի սահմաններում, իրենց շենքի բակում տեղի ունեցած վիճաբանության ժամանակ որդուն դանակահարել է նույն շենքի բնակիչը՝ ծնված 1995 թ.-ին:

Դեպքի առթիվ 2020 թվականի մայիսի 16-ին ՀՀ քննչական կոմիտեի Լոռու մարզային քննչական վարչությունում ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը)  1-ին մասով հարուցվել է քրեական գործը: 27-ամյա երիտասարդը տուժող է ճանաչվել:

Կատարված քննչական գործողությունների և օպերատիվ-հետախուզական միջոցառումների արդյունքում պարզվել է, որ նշված հանցագործությունը կատարել է Վանաձոր քաղաքի բնակիչը՝ ծնված 1995 թ.-ին: Վերջինս ձերբակալվել է:

Նախաքննության ընթացքում կատարվել է դեպքի վայրի զննություն: Հայտնաբերվել են արնանման հետքեր, ագրավվել են հագուստներ, հարցաքննվել են մի շարք անձինք: Նշանակվել են դատաբժշկական փորձաքննություններ:

Նախաքննությունը շարունակվում է: