ԵՐԵՎԱՆ, ՀՈւԼԻՍԻ 9, 24News
«Մեր իրավունքը խախտվել է այն առումով, որ ԱԺ «Լուսավոր Հայաստան» խմբակցությունը պետք է ունենար 18 մանդատ, բայց այսօր ունի 17 մանդատ»: Այդ մասին ԱԺ-ում լրագրողների հետ ճեպազրույցի ժամանակ ասաց խմբակցության պատգամավոր Անի Սամսոնյանը, ապա հավելեց, որ խնդիրն այն է, որ այդ 1 մանդատոց իրենց դեմ հակաքարոզչություն կարող են անել:
«Խնդիր ենք տեսնում այն հաշվով, որ մեր մանդատով կարող են իրականացնել այլ քաղաքական գործունեություն, այսինքն՝ ստեղծել այլ քաղաքական նախաձեռնություն, «Լուսավոր Հայաստան»-ի նկատմամբ իրականացնել հակաքարոզչություն: Ինչևէ, ԿԸՀ-ն իր որոշումը կայացրեց: Մենք կշարունակենք մեր աշխատանքները և կդիմենք բողոքարկան ընթացակարգերին»,-նշեց պատգամավորը, ապա հավելեց, որ մարտավարական մյուս քայլերի մասին առայժմ չի կարող բարձրաձայնել:
Հուլիսի 8-ին Կենտրոնական ընտրական հանձնաժողովը մերժել էր պատգամավոր Էդմոն Մարուքյանի՝ «Լուսավոր Հայաստանի» 18-րդ մանդատը վերականգնելու դիմումը: Այդ 1 մանդատը պատգամավոր Արման Բաբաջանյանի մանդատն է, որը դուրս է եկել խմբակցությունից:
--00—ԼՄ