ԵՐԵՎԱՆ, ՀՈւԼԻՍԻ 22, 24News
Հուլիսի 21-ի երեկոյան միջադեպ է տեղի ունեցել «ՍԻԼ Կոնցեռն» ՍՊԸ-ի հիմնադիր, գործարար Խաչատուր Սուքիասյանին պատկանող գրասենյակներից մեկում։ Ըստ Մոսկվայում բնակվող գործարար Օնիկ Կարապետյանի՝ Խաչատուր Սուքիասյանի կրտսեր եղբայրը Երևանի Զավարյան փողոցում գտնվող գրասենյակում (Սիլաչի հյուրանոցի հարևանությամբ) թիկնապահի հետ ծեծի է ենթարկել իրեն, հայտնում է NEWS.am-ը:
«Ինձ զանգահարեցին, ասացին, որ մորքուրիդ տղայի հետ կապված խոսակցություն կա, 2016 թ. իրար հետ գործ եք արել, իրեն փող ես պարտք։ Ասացի՝ դուք դրա հետ ի՞նչ կապ ունենք, ասացին՝ արի՛, կխոսենք»,-աղբյուրին հայտնել է գործարար Օնիկ Կարապետյանը, ապա պատմել, որ տարիներ առաջ Մոսկվայում մորաքրոջ որդու հետ շինարարության հետ կապված գործ են սկսել, սակայն չեն հաջողել և ֆինանսական վնասներ են կրել, այնուհետև մորաքրոջ որդին պահանջել է վերադարձնել իր ներդրած գումարը, մինչդեռ Կարապետյանը պնդում է, որ ամեն ինչ օրինական է եղել, և ինքը որևէ մեկին գումար պարտք չէ։
«Գնացի Սիլաչիի կողմերը, իրենց տարածքն էր, Ռուբենն ու ախրանիկներն էին։ Ռուբենն ասաց՝ մեր փողն ա, մեզ պետք ա տաս էդ փողը, ասացի՝ ես ոչ մեկին փող պարտք չեմ։ Սկզբում ասացին՝ իբր 80.000 ԱՄՆ դոլար եմ պարտք, հետո՝ 200.000 դոլար։ Ռուբենն ասաց՝ քեզ երկու օր ժամանակ, եթե 200.000 դոլար չբերես, ուրեմն տունդ վարի կտանք, տանդ տեղն էլ գիտենք, քեզ էլ գիտենք։ Ես ասացի՝ ոչ մեկին էլ պարտք չեմ, ու էդ խոսքիս վրա Ռուբենն էր ու իր ախռանի պետ Արտաշը սկսեցին հարվածել ինձ, դեմքիս ու գլխիս էին խփում, քիթս ջարդել են։ Ինձ ասացին՝ աջ ու ձախ չանես, ոչ մի տեղ չգնաս, չբողոքես, մեկ ա՝ վարչապետն էլ ա մեր յանից, ոստիկանությունն էլ»,-ասել է Կարապետյանը և հավելել, որ գիշերն անցկացրել է հիվանդանոցում, որտեղ քթի վիրահատության է ենթարկվել:
Շարունակությունը՝ NEWS.am-ում:
--00—ԼՄ