Գագիկ Ծառուկյանը ուղերձ է հղել Հայաստանի եզդի համայնքին

ԵՐԵՎԱՆ, ՕԳՈՍՏՈՍԻ 3, 24News 

Ծառուկյան

ԲՀԿ առաջնորդ Գագիկ Ծառուկյանը ուղերձ է հղել Հայաստանի եզդի համայնքի  ներկայացուցիչներին Սինջարում իրականացված ցեղասպանության տարելիցի կապակցությամբ:

«Հայաստանի եզդիական համայքն այսօր ոգեկոչում է 6 տարի առաջ Իրաքի հյուսիսում՝ Սինջար քաղաքում զոհված իրենց հայրենակիցների հիշատակը:

Որպես 1915 թվականի մեծագույն ողբերգությունը՝ Հայոց ցեղասպանությունը վերապրած ժողովուրդ, մենք որևէ դեպքում չենք կարող անտարբեր լինել եղբայրական եզդի ժողովրդի կորստի ցավի ու վշտի նկատմամբ: Եզդի ժողովրդի նկատմամբ իրականացված ոճիրը պետք է միջազգային հանրության կողմից արժանանա համարժեք գնահատականի, որևէ նմանատիպ հանցագործություն չպետք է անպատիժ մնա:

Մեր երկրում որպես լիիրավ քաղաքացիներ ապրում են հազարավոր եզդիներ և նրանց նկատմամբ կատարված քաղաքական, պատմական, ռազմական անարդարությունն ու ոճրագործությունը պետք է հստակ գնահատական ստանան:

Սիրելի՛ եզդի քույրեր և եղբայրներ, կիսում եմ ձեր վիշտը և թող որ այլևս երբեք որևէ ազգ չառնչվի նմանատիպ ոճրագործության: Աստված պահապա՛ն մեզ բոլորիս»,- ասված է ուղերձում:

--0--ԱՀ