ԵՐԵՎԱՆ, ՕԳՈՍՏՈՍԻ 15, 24News
Բելառուսի նախագահ Ալեքսանդր Լուկաշենկոն հայտարարել է, որ ընտրություններից հետո ստեղծված ներքաղաքական իրավիճակը կարգավորելու հարցում Բելառուսն օտարերկրյա միջնորդների կարիք չի զգում:
«Լսեք, մեզ մոտ նորմալ կառավարություն է, որ ձևավորվել է Սահմանադրությանը համապատասխան: Մեզ պետք չեն օտարերկրյա կառավարություններ, միջնորդներ: Այդ երկրների ղեկավարներին վիրավորել չցանկանալով հանդերձ՝ ես ուզում եմ ասել. Դուք դեռ ձեր երկիրը կարգի բերեք»,- ասել է նա:
Լուկաշենկոն նաև հայտարարել է, որ իր երկիրը երբեք չի ղեկավարի արտերկրում գտնվող որևէ կառավարություն՝ որ երկրում էլ այն լինի:
«Դուք, ինչ է, պատմություն չե՞ք ուսումնասիրել»,- ասել է նա:
Բելառուսի նախագահը խոստովանել է՝ երկրում իրավիճակը դյուրին չէ, սակայն վերահսկելի է:
«Դուք նույնպես գիտեք՝ ինչ է կատարվում մեր երկրում: Կամաց-կամաց փորձում են ներքաշել հանրությանը. Հասել են աշխատանքային կոլեկտիվներին: Ես բազմաթիվ անգամ եմ ասել, պարզապես ուզում եմ հիշեցնել՝ այդ ամենը որևէ արդյունքի չի բերի: Մենք երկիրը որևէ մեկին չենք հանձնի: Իսկ իրավիճակը կկարողանանք վերահսկել»,- նշել է Լուկաշենկոն:
--00--ԱԹ