ԵՐԵՎԱՆ, ՕԳՈՍՏՈՍԻ 22, 24News
Ընդդիմադիր «Եվրոպական Վրաստան» կուսակցությունը ներկայացնող Սերգի Կապանաձեն այն կարծիքին է, որ ՌԴ-ում կորոնավիրուսի մասշտաբները հաշվի առնելով` թռիչքների վերականգնումը սխալ կլինի: Այս մասին գրել է Aliq.ge-ն։
Ըստ ընդդիմադիր քաղաքական գործչի` Վրաստանի համար կարևոր է, որ չվերթները վերականգնվեն «կանաչ գոտու» երկրների հետ: Կապանաձեն թեմային անդրադարձել է` կապված Ռուսաստանի արտգործնախարար Սերգեյ Լավրովի այն հայտարարության հետ, թե ՌԴ-Վրաստան օդային հաղորդակցության վերականգնումը մոտ ապագայի հարց է: Հիշեցնենք` նախորդ տարվա հուլիսի 8-ին Վրաստանի հետ ավիահաղորդակցությունը դադարեցվեց. Կրեմլն այս կերպ որոշել էր «պատժել» Վրաստանի` այսպես կոչված «Գավրիլովյան գիշերվա» և դրան հետևած մասսայական բողոքների ու հակառուսական տրամադրությունների համար:
Ի դեպ, այսօր թեմային անդրադարձել է նաև վարչապետի՝ Ռուսաստանի հետ հարցերով հատուկ ներկայացուցիչ Զուրաբ Աբաշիձեն` նշելով,որ չվերթները կվերականգնվեն` ՌԴ-ում համաճարակային իրավիճակից ելնելով և ՌԴ-ի քաղաքական կամքի պայմաններում, և որ դա կախված է հիմնականում Մոսկվայից:
Նրա խոսքով՝ քանի որ չվերթները դադարեցվել են ռուսական կողմի որոշմամբ, համապատասխանաբար, դրանց վերսկսման որոշումը նույնպես պետք է ռուսական կողմից լինի։
-- 00—ՄՀ