Հայաստանի մեծագույն և վերջնական պարտությունը կլինի երկրի հայաթափումը․ Աննա Գրիգորյան

ԵՐԵՎԱՆ, ՓԵՏՐՎԱՐԻ 1, 24News

․

ՀՀ Ազգային ժողովի անկախ պատգամավոր Աննա Գրիգորյանը գրում է.

«Հայաստանի մեծագույն և վերջնական պարտությունը կլինի երկրի հայաթափումը։

Ետպատերազմյան բարդ շրջանում, տնտեսական և քաղաքական ճգնաժամի պայմաններում այժմ յուրաքանչյուր հայ պիտի իր մեջ ուժ գտնի կայացնելու իր կյանքի կարևորագույն որոշումներից մեկը՝ երկրից չհեռանալու որոշումը։ Իսկ ավելի լավ՝ երկիր վերադառնալու իր որոշումը։

Հեռանալու պատճառներն, իհարկե, բազում են։ Հաճախ անգամ՝ օբյեկտիվ։ Տեղեկատվական բացասական հոսքը այսօր մեր տնտեսական խնդիրներին գումարում է նաև վախը և անվստահությունն ապագայի հանդեպ, որոնք պիտի կարողանանք հաղթահարել։

Պիտի թույլ չտանք, որ հայրենիքի կորսված լինելու զգացողությունն ի վերջո հանգեցնի դրա փաստացի կորստին։ Հայաստանում մնալն ու մեր բազմապատկված ջանքերը երկրի շենացման գործում ներդնելն այսօր կարևորագույն քայլն է, որը պիտի անենք։

Հայաստանն անպայման վերապրելու է, վերականգնվելու է, ապաքինելու է իր վերքերն ու նոր կյանք է ստանալու։ Եվ հանուն այդ նոր կյանքի, մենք չպիտի խնայենք ոչինչ։

Եթե այսօր ունենք երկրից գնալու կամ չգնալու ընտրություն, պարտավոր ենք ընտրել ՉԳՆԱԼԸ»։

--00--ԱՀ