ԵՐԵՎԱՆ, ԴԵԿՏԵՄԲԵՐ 17, 24News
Պետական վերահսկողական ծառայության՝ սպորտի և երիտասարդության հարցերի նախարարությունում բազմամիլիոնանց չարաշահումներ հայտնաբերելու մասին տեղեկությունը չի համապատասխանում իրականությանը։ Այս մասին 24News-ի հետ զրույցում նշեց ՊՎԾ լրատվության և հասարակության հետ կապերի բաժնի պետի ժամանակավոր պաշտոնակատար Զարուհի Մեժլումյանը։
«Պետական վերահսկողական ծառայությունը սպորտի և երիտասարդության հարցերի նախարարությունում դեռ ուսումնասիրություններ չի կատարել, հետևաբար այնտեղ բազմամիլիոնանց չարաշահումներ հայտնաբերելու մասին լուրը չի համապատասխանում իրականությանը», - նշեց Զարուհի Մեժլումյանը, ապա տեղեկացրեց, որ Պետական վերահսկողական ծառայությունն ուսումնասիրություն է կատարում՝ ըստ հանձնարարականի։ Սպորտի և երիտասարդության հարցերի նախարարությունում ուսումնասիրություն կատարելու վերաբերյալ որևէ հանձնարարական չեն ստացել։
Հիշեցնենք, որ «Ժամանակ» օրաթերթը հրապարակել էր հոդված՝ «Բազմամիլիոնանց չարաշահումներ՝ սպորտի և երիտասարդության հարցերի նախարարությունում» վերտառությամբ, որտեղ ասվում է․
«Պետական վերահսկողական ծառայությունը ստուգումներ է իրականացրել սպորտի և երիտասարդության հարցերի նախարարությունում, հայտնաբերել բազմամիլիոնանց չարաշահումներ: Այս բացահայտումներին առայժմ հանրային հնչողություն չի տրվում: Իշխանությունը սպասում է նոր կառավարության ձևավորմանը, երբ այս նախարարությունը կլուծարվի և կմիանա մշակույթի նախարարությանը, և նախարար Գաբրիել Ղազարյանը կդառնա շարքային քաղաքացի: Այդ դեպքում քրեական գործի հարուցումը չի ազդի կառավարության հեղինակության վրա»: