ԵՐԵՎԱՆ, ԴԵԿՏԵՄԲԵՐ 18, 24News
«Ոսկե ծիրան» Երևանի միջազգային կինոփառատոնում սերնդափոխություն է, հիմնադրումից 15 տարի անց կինոփառատոնի ղեկավարներին փոխարինելու են գալիս նորերը։ Այդ մասին այսօր՝ դեկտեմբերի 18-ին հրավիրած ասուլիսի ընթացքում հայտարարեց կինոփառատոնի հիմնադիր Հարություն Խաչատրյանը։
«Կյանքը շատ է փոխվել, ժամանակն է տեղը զիջել երիտասարդ ուժերին»,- նշեց Հարություն Խաչատրյանը:
15 տարի առաջ «Ոսկե ծիրան» կինոփառատոնը հիմնադրել ու այդ տարիների ընթացքում ղեկավարել են Հարություն Խաչատրյանը, Միքայել Ստամբոլցյանը և Սուսաննա Հարությունյանը։
«15 տարիների ընթացքում «Ոսկե ծիրանը» անճանաչելի փոքրիկ, գյուղական փառատոնից վերածվեց միջազգային ճանաչում ունեցող փառատոնի։ 2-3 հազար հանդիսատես ունեինք, վերջին տարիներին հասել է 40-50 հազարի։ Որոշեցինք փորձել նորը, նոր ղեկավարներ հրավիրել»,- ասաց Խաչատրյանը։
Փառատոնի նոր տնօրենը Հասմիկ Հովհաննիսյանն է, ծրագրերի ղեկավարը՝ Կարեն Ավետիսյանը։ Հարություն Խաչատրյանի բնորոշմամբ՝ «Ոսկե ծիրանի» նոր կազմը լուրջ կրթություն ունի, շատ լավ ծանոթ է փառատոնին և համաշխարհային կինոյին։