ԵՐԵՎԱՆ, ԴԵԿՏԵՄԲԵՐ 18, 24News
Ադրբեջանի արտգործնախարար Էլմար Մամեդյարովը հայտարարել է, որ հայ գործընկերոջ՝ Զոհրաբ Մնացականյանի հետ Միլանում տեղի ունեցած բանակցությունների ընթացքում փոխըմբռնման են հասել Արցախի հակամարտության խնդրի շուրջ։ Այդ մասին հաղորդում է «Ինտերֆաքսը»։
«Կարծում եմ՝ Միլանում տեղի ունեցած վերջին հանդիպման ժամանակ իմ հայ գործընկերոջ հետ առաջին անգամ տևական ժամանակից հետո համաձայնության եկանք»,- ասել է Էլմար Մամեդյարովը երեքշաբթի՝ դիվանագիտական կորպուսի ղեկավարների ընդունելության ժամանակ, երբ ամփոփել են 2018 թ. արդյունքները։
Նախարարը նշել է, որ Լեռնային Ղարաբաղի հակամարտության կարգավորման ուղիների որոնումը Ադրբեջանի համար մնում է 2019-ի գլխավոր խնդիրը:
«Իմ ժամանակի մեծ մասը նվիրված է եղել ղարաբաղյան հակամարտության լուծման ուղիներ որոնելուն։ Դա նաև հաջորդ տարվա գլխավոր խնդիրը կլինի։ Հիմնական նպատակը շոշափելի արդյունքների հասնելն է»,- ընդգծել է նախարարը:
Նրա խոսքով՝ Զոհրաբ Մնացականյանի հետ 2019 թ. հունվարին նախատեսվող հանդիպման ընթացքում ևս քննարկվելու են հակամարտության խաղաղ կարգավորման ուղիները:
«Մենք կքննարկենք խնդրի լուծման ուղիները։ Ադրբեջանը հակամարտության խաղաղ կարգավորման կողմնակիցն է», - ասել է Մամեդյարովը։