ԵՐԵՎԱՆ, ՄԱՅԻՍԻ 28, 24News
ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Էնդրյու Շոֆերը (ԱՄՆ) հանդես են եկել հայտարարությամբ, որը ներկայացնում ենք ստորև.
«Համանախագահները մայիսի 27-ին և 28-ին խորհրդակցություններ անցկացրեցին Կարմիր խաչի միջազգային կոմիտեի նախագահ Պիտեր Մաուրերի և ՄԱԿ-ի փախստականների գերագույն հանձնակատար Ֆիլիպին Գրանդիի հետ: Հանդիպումներին մասնակցում էր նաև ԵԱՀԿ գրասենյակի նախագահի անձնական ներկայացուցիչ Անջեյ Կասպրշիկը: Համանախագահները ի գիտություն են ընդունել մայիսի 27-ին վեց հայ զինծառայողների ձերբակալված լինելու փաստը և կոչ են անում ազատել բոլոր ռազմագերիներին և մյուս կալանավորվածներին։ Համանախագահներն ընդգծում են միջազգային մարդասիրական օրենսդրությանը համապատասխան կալանավորված անձանց հետ վարվելու պարտավորությունը: Համանախագահները վճռականորեն կոչ են անում կողմերին անհապաղ վերացնել Լեռնային Ղարաբաղ մարդասիրական օգնության մուտքի բոլոր սահմանափակումները, և կողմերին կոչ են անում ամբողջությամբ իրականացնել նոյեմբերի 9-ի հրադադարի հայտարարագրով ստանձնած պարտավորությունները:
Համանախագահները մտահոգությամբ նշում են նաև Հայաստան-Ադրբեջան ոչ գծանշված սահմանին տեղի ունեցած միջադեպերի վերաբերյալ վերջերս տեղի ունեցող գործընթացների մասին: Սահմանային վեճերը լուծելու համար ուժի գործադրումը կամ սպառնալիքն անընդունելի է: Մենք երկու կողմերին կոչ ենք անում անհապաղ քայլեր ձեռնարկել՝ ներառյալ զորքերի հետքաշում, իրավիճակը լիցքաթափելու և սահմանը խաղաղ բանակցությունների միջոցով դելիմիտացիա և դեմարկացիա սկսելու համար: Համանախագահները պատրաստ են աջակցել այս գործընթացին։
Հաշվի առնելով ԵԱՀԿ-ի իրենց մանդատի պայմանները և տարածաշրջանի բոլոր բնակիչների ձգտումները դեպի կայուն, խաղաղ և բարեկեցիկ ապագա ՝ համանախագահները կրկին կոչ են անում կողմերին հնարավորինս շուտ վերսկսել բանակցությունները ԵԱՀԿ Մինսկի խմբի համանախագահության միջնորդությամբ»։
--00--ԱԹ