ԵՐԵՎԱՆ, ՀՈՒԼԻՍԻ 22, 24News
Իրավիճակը Երասխում գիշերը հարաբերականորեն հանդարտ է եղել: Այս մասին 24News-ը տեղեկացավ ՀՀ պաշտպանության նախարարությունից:
Նախարարությունից տեղեկացրեցին, որ իրավիճակը շարունակում է հարաբերականորեն հանդարտ մնալ նաև Գեղարքունիքի և Սյունքիի մարզերում:
Հիշեցնենք, որ հուլիսի 19-ի երեկոյան ադրբեջանական զինված ուժերը մի քանի ժամ շարունակ, տարբեր տրամաչափի հրաձգային զինատեսակներից գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը:
Ադրբեջանական զինուժի հրետակոծության հետևանքով ուսի հատվածում վիրավորում էր ստացել Երասխ համայնքի ղեկավար Ռադիկ Օղիկյանը:
Կրակոցներ էին հնչել նաև Գեղարքունիքի և Սյունիքի մարզերի հայկական դիրքերի ուղղությամբ։
Պատասխանելով հարցին, թե օրեր առաջ մառախուղի պատճառով կորած զինծառայողների գտնվելու վերաբերյալ ի՞նչ տեղեկություններ կան, նախարարությունից նշեցին, որ որոնողական աշխատանքները շարունակվում են, զինծառայողները և ավտոմքենան չեն գտնվել, տեղեկության դեպքում կհայտնեն:
Նշենք, որ Հուլիսի 14-ի լուսադեմին, մառախուղի պայմաններում, ամրակցված զինվորական ավտոմեքենայով ծառայողական պարտականությունները կատարելու ընթացքում կորել է կապը Հայաստանի Հանրապետության հարավ-արևելյան ուղղությամբ տեղակայված ՀՀ ԶՈՒ N զորամասի զինծառայող Արթուր Նալբանդյանի և վարորդ Արամայիս Տոռոզյանի հետ։ Անմիջապես մեկնարկել են որոնողա-փրկարարական աշխատանքներ, որոնք դեռևս արդյունք չեն տվել։
Ռուսական կողմի միջնորդությամբ, Ադրբեջանի ԶՈՒ ներկայացուցիչների հետ քննարկվում է Ա. Նալբանդյանի և Ա. Տոռոզյանի՝ ադրբեջանական տարածքում հայտնվելու հավանականությունը։
Հավելենք` Արթուր Նալբանդյանն ու Արամայիս Տոռոզյանը եղել են առանց զենքի։
--00--ԿԿ