ԵՐԵՎԱՆ, ՀՈՒԼԻՍԻ 29, 24News
ՀՀ փաստաբանների պալատի նախագահ Արա Զոհրաբյանը երեկ դիմել է ՀՀ բարձրագույն դատական խորհրդի նախագահի պաշտոնակատար Գագիկ Ջհանգիրյանին Վերաքննիչ քրեական դատարանի շենքից համակարգիչների առգրավման հարցով:
Զոհրաբյանը գրության մեջ նշել է. «Լրատվամիջոցների հրապարակումների համաձայն Ազգային անվտանգության ծառայության աշխատակիցները Վերաքննիչ քրեական դատարանի շենքից առգրավել են համակարգիչներ։
Փաստաբանների ահազանգներից պարզ է դառնում, որ Վերաքննիչ քրեական դատարանում գործերի բաշխումը չի կատարվում հատուկ համակարգչային ծրագրի միջոցով:
Հատուկ համակարգչային ծրագրի միջոցով գործերի բաշխման հիմքում դրված պատահական ընտրության սկզբունքը երաշխավորում է դատավորների անկախությունը, ինչպես նաև դատավարության կողմերի՝ արդար դատաքննության իրավունքը:»
ՀՀ դատական օրենսգրքի 41-րդ հոդվածի կանոնակարգումները հաշվի առնելով ՀՀ փաստաբանների պալատի նախագահը խնդրել է գրավոր հայտնել՝
«1. ի՞նչ հիմքերով են առգրավվել ՀՀ վերաքննիչ քրեական դատարանի համակարգիչները.
2. արդյո՞ք այդ առգրավման փաստը գնահատվել է, որպես անհաղթահարելի ուժի ազդեցություն, և արդյո՞ք ստացվել է ՀՀ վերաքննիչ քրեական դատարանի նախագահի՝ ՀՀ դատական օրենսգրքի 41-րդ հոդվածի 5-րդ մասով նախատեսված տեղեկացումը.
3. ՀՀ դատական օրենսգրքի 41-րդ հոդվածի 5-րդ մասի հիմքով Բարձրագույն դատական խորհուրդը քննարկե՞լ է արդյոք պատճառները և դրանց վերացման ուղղությամբ կատարման համար ի՞նչ պարտադիր ցուցումներ է տվել դատական դեպարտամենտին.
4. արդյո՞ք հնարավոր չէ նոր համակարգչում ներբեռնել գործերի բաշխման համակարգչային ծրագիր և ի՞նչ ժամկետում եք նախատեսում վերականգնել հատուկ համակարգչային ծրագրի միջոցով գործերի բաշխման բնականոն աշխատանքը»:
Բարձրագույն դատական խորհրդի լրատվական ծառայությունից փորձեցինք պարզել, թե արդյոք ստացել են Արա Զոհրաբյանի դիմումը և ի՞նչ փուլում է գտնվում այն.
«Նշեմ, որ ԲԴԽ-ն ամեն օր է պետական և ոչ պետական մարմիններից ստանում բազմաթիվ դիմումներ, գրություններ, որոնց մի մասը առնչվում է ԲԴԽ լիազորություններին, մի մեծ մասն էլ՝ որևէ աղերս չունի:
Ինչ վերաբերվում է երեկ ստացած մեր դիմումներին, այո՛, դրանց մեջ կար նաև պարոն Զոհրաբյանի ներկայացրած դիմումը, որն ուսումնասիրելուց հետո, ըստ սահմանված կարգի՝ կպատասխանենք»:
--00--ԿԿ