ԵՐԵՎԱՆ, ՍԵՊՏԵՄԲԵՐԻ 13, 24News
Արդեն 2 օր է՝ Երևան քաղաքի բնակիչներ Նունե և Ռաֆիկ Ալեքսանյանները փորձում են ժողովրդին հայտնի թաղման բյուրոյից ստանալ հստակ պատասխան, թե ով կամ ովքեր և ում թույլտվությամբ են ոտնձգություն կատարել Քանաքեռի գերեզմաններում գտնվող իրենց ընտանեկան գերեզմանի նկատմամբ: Այսօր՝ սեպտեմբերի 13-ին, Shamshyan.com-ի հետ զրույցում Ալեքսանյաններն ասում էին.
«Մի քանի օր առաջ հերթական անգամ այցելեցինք 1973թ.-ից մեր ընտանեկան գերեզման, որտեղ այդ թվականին հուղարկավորվել է պապիկս՝ Նշան Ալեքսանյանը, իսկ 1984թ.-ին՝ հուղարկավորվել է տատիկս՝ Արաքսյա Ալեքսանյանը: Այցելեցինք գերեզման ու մնացինք ապշած: Մեր ընտանիքին պատկանողղ գերեզմանի մի ահագին հատված չգիտես ում կողմից վանդալիզմի է ենթարկվել: Կոտրել ու դեն են շպրտել ճաղավանդակները, սեղանն ու նստարանը, փոխարենը մի նոր շիրիմ է հայտնվել:
Պարզեցինք, որ մեզ պատկանող տարածքը թաղման բյուրոն տվել է մեկ այլ քաղաքացու, քաղաքացին էլ, չիմանալով եղելությունը, իր հարազատին հուղարկավորել է: Նրան մենք չենք մեղադրում, մեղավորը Քանաքեռի գերեզմանոցի պատասխանատուներն են, ովքեր, հավանաբար ինչ-որ շահից ելնելով, ապականել են մեր գերեզմանը և մի ամբողջ հատված տրամադրել այլ քաղաքացու:
Կատարվածի մասին արդեն տեղեկացրել ենք Քանաքեռ-Զեյթունի ոստիկանություն, սպասում ենք, որ օբյեկտիվ հետաքննություն կանցկացնեն և մեղավորները կենթարկվեն ամենախիստ պատասխանատվության: Այս տեսակ վանդալիզմ ինչպես կարող էր հայը թույլ տալ: Քանաքեռի գերեզմանատան պատասխանատուների ու թաղման բյուրոյի հետ քանի օր է, փորձում ենք կապ հաստատել, մեր հեռախոսազանգերին չեն պատասխանում»:
Մանրամասները՝ տեսանյութում:
--00--ԱԹ