ՌԴ-ի ու ՀՀ-ի համագործակցության հեռանկարները մեծ են, կան բեկումնային նախագծեր ու գաղափարներ

ԵՐԵՎԱՆ, ՍԵՊՏԵՄԲԵՐԻ 20, 24News

Տնտեսական

Չնայած համավարակին՝ Ռուսաստանը պահպանեց Հայաստանի առաջատար առևտրային գործընկերոջ իր կարգավիճակը: «Արմենպրես»-ի հաղորդմամբ՝ այս մասին Երևանում Armenia Business Forum-ի բացման իր խոսքում ասել է ՌԴ փոխվարչապետ Ալեքսեյ Օվերչուկը:

«ԵԱՏՄ-ին Հայաստանի միանալուց և համավարակից ի վեր երկրների միջև առևտուրը կրկնապատկվել է ՝ 1,3 միլիարդ դոլարից հասնելով 2,5 միլիարդ դոլարի:

Անցյալ տարի մեր շրջանառությունը նվազեց 9.5 տոկոսով, բայց արդեն այս տարվա հունվար-հուլիսին կրճատումը հաղթահարվեց: Եվ մենք նշում ենք 17.2 տոկոս աճ: Դա շատ լավ աճ է, բայց մենք չպետք է կանգ առնենք։ Համագործակցության հեռանկարները մեծ են, կան բեկումնային նախագծեր ու գաղափարներ: Եվ ամենակարևորը`դրանք իրականացնելու ցանկություն», - ասել է Օվերչուկը՝ հավելելով, որ այսօրվա ֆորումը դրա վառ օրինակն է:

ՌԴ փոխվարչապետը հայտնել է, որ Ռուսաստան-Հայաստան առևտրաշրջանառության և ներդրումային փոխազդեցության ավելացման նպատակով սկսվել է միջնաժամկետ հեռանկարում նոր ռազմավարական միջկառավարական փաստաթուղթ մշակվել: Դա տնտեսական համագործակցության ծրագիր է մինչև 2025 թվականը, որում կարձանագրվեն նաև երկու երկրների տնտեսական համագործակցության հիմնական ոլորտները:

Օվերչուկի խոսքով` Հայաստանը ցուցադրում է ԵԱՏՄ գործընկերների հետ փոխադարձ առեւտրի աճի ամենաբարձր տեմպերը:

ՌԴ պաշտոնյան նշել է, որ Միությանը երկրի անդամակցությունից ի վեր եւ մինչեւ 2019 թվականը ԵԱՏՄ-ում գործընկերների հետ Հայաստանի ապրանքների արժեքային ծավալն աճել է 82 տոկոսով:

«Խմիչքների մատակարարումը ավելացել է 1.5 անգամ, թանկարժեք մետաղների մատակարարումը` 2 անգամ, օպտիկայի եւ չափիչ սարքավորումների մատակարարումը`10 անգամ: 2020 թվականին ԵԱՏՄ-ում փոխադարձ առեւտուրը նվազել է 13.6 տոկոսով, բայց արդեն այժմ ապրանքաշրջանառությունն աճել է 31.9 տոկոսով: 2020 թվականի առաջին կիսամյակում ՀՆԱ-ն աճել է 4.2 տոկոսով, արդյունաբերական արտադրանքը ՝ 4.4 տոկոսով, գործազրկությունը նվազել է 5 տոկոսով», - նշել է Օվերչուկը:

--00--ԿԿ