ԵՐԵՎԱՆ, ՍԵՊՏԵՄԲԵՐԻ 28, 24News
Իրանը չի հանդուրժի սիոնիստական ռեժիմի ցուցադրական ներկայություն` իր սահմանների մոտ: Այս մասին հայտնել է Իրանի ԱԳՆ ներկայացուցիչ Սաիդ Խաթիբզադեն՝ պատասխանելով Ադրբեջանի նախագահ Իլհամ Ալիևի` Իրանի կողմից անցկացվող զորավարժությունների հետ կապված դժգոհությանը:
Նա, մասնավորապես, նշել է.
«Հաշվի առնելով, որ երկու երկրների միջև դրական և հարգալից հարաբերություններ են, կողմերի միջև հաղորդակցման սովորական ուղիներն ամենից բարձր մակարդակում են, զարմանալի է այս կերպ արտահայտվելը: Այս և դրա հետ փոխկապակցված այլ հարցեր երկու երկրների ԱԳ նախարարների կողմից լրջորեն քննարկվել են Նյու-Յորքում` ՄԱԿ-ի ասամբլեայի շրջանակներում: Որոշում է կայացվել շարունակել երկխոսությունը հարմար հարթակում:
Իրանը միշտ հանդես է գալիս ցանկացած օկուպացման դեմ` ընդգծելով երկրների տարածքային ամբողջականությունն ու միջազգայնորեն ճանաչված սահմանները հարգելու անհրաժեշտությունը: Միևնույն ժամանակ, բարիդրացիության սկզբունքների պահպանումը կարևորագույն հարցերից մեկն է, ու մենք ակնկալում ենք, որ հարևանները դրան ուշադրություն կդարձնեն:
Մեր երկրի հյուսիս-արևմտյան սահմաններին զորավարժությունների անցկացումը սուվերենության հարց է. այդ վարժանքներն անցկացվում են` հանուն տարածաշրջանում խաղաղության ու կայունության:
Իհարկե, ակնհայտ է, որ Իրանը չի հանդուրժի իր սահմաններին սիոնիստական ռեժիմի ներկայությունը և այդ համատեքստում կձեռնարկի ցանկացած գործողություն, որ անհրաժեշտ կհամարի իր ազգային անվտանգության համար»:
--00--ԱԹ