ԵՐԵՎԱՆ, ՀՈՒՆՎԱՐ 18, 24News
Զինված ուժերի զինծառայողների սննդակարգում 2019 թվականին փոփոխություններ է կատարվել. ձմեռային ժամանակահատվածում զինծառայողներին լրացուցիչ կհատկացվի բնական մեղր, սխտոր, ճարպ և լավաշ: Այդ մասին Կենտրոնական պարենային բազայում լրագրողների հետ զրույցում այս մասին ասել է Զինված ուժերի թիկունքի վարչության ծառայության պետ, գնդապետ Արա Մարգարյանը:
«Ձմեռային ժամանակահատվածում պլանավորվել է մեկ զինծառայողի հաշվարկով հատկացնել բնական մեղր, որն ունի շատ առողջարար հատկություններ, նաև պլանավորել ենք ավելացնել ճարպ և սխտոր: Զինծառայողի սննդակարգում մայիս ամսում պարտադիր բոլոր զինծառայողներին հասանելիք հացի 40 տոկոսի չափով կհատկացվի լավաշ: Ավելացրել ենք նաև թանապուր, այն տրամադրվել է մարտական հերթապահություն իրականացնող զինծառայողներին և շատ բարձր գնահատականի է արժանացել զինծառայողների կողմից»,- ասել է Մարգարյանը:
Գնդապետը նաև ասել է, որ 2019 թվականին նախատեսվում է հերթապահություն իրականացնող զինվորների սննդակարգում համալրել պահածոյացված կարտոֆիլ: Մարտական հերթապահությունում կլինի 7 տեսակի պահածոյացված ապուր: Արա Մարգարյանը ծանոթացրել է նաև սննդամթերքի պահպանման եղանակներին, ինչպես նաև փաթեթավորմանը և համապատասխան պիտակներին:
«Կենտրոնական պարենային բազայում ունենք նոր սառնարանային տնտեսություն, մեծացել են դրանց ծավալները, ինչը արդեն հնարավորություն է տալիս շուտ փչացող սննդամթերքը պահպանել համապատասխան ջերմախոնավային պայմաններում: Պահածոյացված սննդամթերքի համար նախատեսված են տարբեր պահեստարաններ, որտեղ ըստ անվանումների և ըստ արտադրման տարեթվերի պահպանություն ենք իրականացնում: Կենտրոնական պարենային բազայից մատակարարումներից հետո սահմանված կարգով առաքվում են տարածքային բազաներ և այնտեղից տեղափոխվում զորամասեր»,- ասել է գնդապետը: