Լոռու մարզում կորոնավիրուսի դեմ պատվաստվել է 95 339 մարդ

ԵՐԵՎԱՆ,  ԴԵԿՏԵՄԲԵՐԻ 15,  24 News

պատվաստում

Լոռու մարզպետ Արամ Խաչատրյանն անցկացրել է աշխատանքային խորհրդակցություն, որին ներկա են փոխմարզպետ Գոռ Ասրյանը, մարզպետարանի գլխավոր քարտուղար Կամո Աշրաֆյանը, կառուցվածքային ստորաբաժանումների ղեկավարներ և պատասխանատու պաշտոնյաներ:

Քննարկվել են առանցքային հարցեր մարզում իրականցվող միջազգային ու տեղական ծրագրերի, գյուղատնտեսական ցուցանիշների, քաղաքաշինության, սոցիալական, առողջապահական, համայնքների սեփական եկամուտների հավաքագրման, մարզում իրականացվող 2021թ. սուբվենցիոն ծրագրերի ընթացքի ու արդյունքների վերաբերյալ և այլ հարցեր։

Մարզպետը նշել է, որ անհրաժեշտ է հետևողական լինել համայնքներում իրականացվող սուբվենցիոն ծրագրերի կատարման ժամկետներին, որակին, առկա թերությունները շտկելու համար հանձնարարականներ տալ շինարարական կազմակերպություններին:

Մարզի ղեկավարին է ներկայացվել, որ Համաշխարհային բանկի ֆինանսավորմամբ Հայաստանի Տարածքային Զարգացման հիմնադրամի կողմից իրականացվող Սոցիալական ներդրումների և տեղական զարգացման ծրագրի լրացուցիչ ֆինանասավորման շրջանակներում նախատեսվում է նոր ենթածրագրերի իրականացում միավորված համայնքներում՝ նպատակ ունենալով բարելավել համայնքների ենթակառուցվածքներն ու մատուցվող ծառայությունները՝ ի նպաստ համայնքների սոցիալ-տնտեսական զարգացման:

Առողջապահության և սոցիալական ապահովության վարչության պետ Ռուզաննա Պողոսյանը զեկուցել է, որ Լոռու մարզի բժշկական հաստատություններում, առողջության առաջնային պահպանման կենտրոններում և շարժական պատվաստումային խմբերի կողմից դեկտեմբերի 14-ի դրությամբ կորոնավիրուսի դեմ պատվաստվել է 95 339 մարդ, որից առաջին դեղաչափ է ստացել 56.445, երկրորդ դեղաչափ՝ 38.894 մարդ: Մարզում համավարակի դեմ պատվաստումներն ակտիվորեն շարունակվում են:

Մարզպետ Արամ Խաչատրյանը հորդորել է պատվաստումների գործընթացին նոր զարկ տալ՝ որպես համավարակի ամենարդյունավետ կանխարգելիչ միջոցառում։ Ամփոփելով խորհրդակցությունը՝ մարզի ղեկավարն անդրադարձել է առաջիկա անելիքներին, մասնավորապես՝ կարևորել զարգացման նոր ծրագրերի իրականացման նպատակով Լոռու մարզում ներդրումների նոր աղբյուրների որոնման և ներգրավման կարևորությունը, տրվել են նոր հանձնարարականներ:

--00—ՄՀ