ԵՐԵՎԱՆ, ՄԱՐՏԻ 28, 24News
Փաստաբան Արա Զոհրաբյանը ֆեյսբուքյան իր էջում գրել է
«Աշխարհն այլևս առաջվանը չի լինելու
Կրթության որակը և մակարդակը 100 ամյակների ընթացքում բարելավվել է, սակայն մարդկային դժբախտությունները, պատերազմները և այլ արհավիրքները չեն պակասել: Հետևություն- միայն կրթված լինելը բավարար չէ:
Բարոյական արժեքներ- ահա թե ինչն է մարդու, հասարակության, պետության և պետությունների գոյատևման և զարգացման գրավականը:
Այն մոլորակում, որտեղ բարոյականությունը զիջում է մարդու ցանկություններին և ցանկություններն այն աստիճանի են գերագնահատված, որ հավասարեցվել են մարդու հիմնարար իրավունքներին, երբ խոսքի ազատությունը դարձել է լկտիության արտոնություն, չի կարող խոսք գնալ խաղաղ գոյակցության մասին:
Ռուս և ուկրաինացի ժողովուրդները եղբայրներ են: Ուկրաինայի իշխանական վերնախավի վարած անհեռանկար քաղաքականության արդյունքում ուկրանիացի ժողովուրդը կանգնել է մեծ դժբախտության առջև: Այդ անհեռանկար քաղաքականության ուղղություններից է նաև հայության նկատմամբ ադրբեջանական ագրեսիան խրախուսելը, որը շարունակվում է նաև այսօր:
Բոլորն էլ հասկանում են, որ սա ռուս-ուկրաինական բախում չէ, սա ավելի խորը գնացող բախում է, որի մեջ ներգրավվելու է նաև Թուրքիան ընդդեմ Ռուսաստանի: Այս տեմպերով, չեն բացառվելու միջուկային զենքի կիրառումները:
Ռուսաստանի նախագահի կողմից ալիևեի հետ 22.02.2022թ. հռչակագրի ստորագրումը գալիս է ապացուցելու թուրքական միջամտության իրատեսական լինելը: Այդ հռչակագրով Ռուսաստանը փորձել է չեզոքացնել Հայաստան-Արցախում նոր ճակատ բացելու ադրբեջանական միջամտությունը, որի փորձերը օրեր առաջ տեսանք: Թե ալիևը Ռուսաստանի և Թուրքայի մեջ ընտրություն կատարելիս ում կընտրի ժամանակը ցույց կտա (առնվազն տակից փորձելու է թուրքական շահը առաջ տանել):
Հայաստանի իշխանությունն էլ իր թուրքասիրությամբ Հայաստան-Արցախին վատ դրության մեջ է դնելու: Որքան ուշ հասկանանք սա, այնքան ավելի խորը կլինենք փոսի մեջ:
Հետևապես, աշխարհն այլևս առաջվանը չի լինելու, իսկ մենք էլ գտնվում ենք Սուրբ Հովհաննես առաքյալի հայտնության մեջ նշված ժամանակաշրջանում»,- գրել է Զոհրաբյանը։
--00--ՍԳ