ԵՐԵՎԱՆ, ԱՊՐԻԼԻ 13, 24News
«Ապրելու երկիր» կուսակցությունը հայտարարություն է տարածել ՀՀ վարչապետ Նիկոլ Փաշինյանի՝ Ազգային ժողովում արված հայտարարության մասին։
«Նիկոլ Փաշինյանն այսօր Ազգային ժողովում հայտարարել է, որ «միջազգային հանրությունը մեզ ասում է՝ մի փոքր իջեցրեք Լեռնային Ղարաբաղի կարգավիճակի հարցում ձեր նշաձողը և միջազգային մեծ կոնսոլիդացիա կապահովեք Հայաստանի և Արցախի շուրջ»։
Արցախցիների ինքնորոշման իրավունքից հրաժարվելուց հետո չի կարող լինել Հայաստանի և Արցախի շուրջ որևէ արժեքավոր կոնսոլիդացիա։
Նիկոլ Փաշինյանն իր ելույթով, ըստ էության, մեզ նախապատրաստում է մեծագույն կորստի։ Նա փորձ է անում թյուր տպավորություն ստեղծել միջազգային հանրության հետ անկեղծ, կառուցողական ու ճիշտ աշխատելու հնարավորությունների մասին և փակել թեմայի մասին բոլոր խոսակցությունները՝ այդպես կրկին անգամ սեփական դիվանագիտական ապիկարությունը, բանակցային սխալներն ու բացթողումները բարդելով այլ դերակատարների վրա, ներառյալ միջազգային հանրության ու միջազգային կառույցների։
Մտածել, որ հայերը կիրացնեն իրենց անքակտելի իրավունքը՝ խաղաղ ապրել իրենց պապերի հողում, իրենց հայրենիքում, որևէ այլ կարգավիճակով, քան ինքնորոշման իրավունքի իրացումն է, կատարյալ ինքնախաբեություն է, իրավիճակին չտիրապետել է, անմեղսունակություն է, ինչպես նաև՝ տասնամյակների պայքարի, նվիրումի և Արցախի ազատության համար նահատակված հազարավոր հայորդիների հիշատակի ուրացում և արժեզրկում:
«Ապրելու երկիր» կուսակցությունն անսակարկելի է համարում Արցախի մեր հայրենակիցների ինքնորոշման իրավունքի իրացումը և դրա հիման վրա ձևավորվող կարգավիճակը, անթույլատրելի՝ Ադրբեջանի կազմում Արցախի կարգավիճակի մասին որևէ քննարկում։ Ուժի և ուժի սպառնալիքի ներքո Ադրբեջանի կողմից պարտադրվող օրակարգը պետք է մերժվի, քանի որ համաձայնվել Արցախի կարգավիճակի մեր ունեցած նշաձողը իջեցնելուն, նշանակելու է համաձայնվել զրկել արցախցիներին իրենց իրավունքներից։ Սա դառնալու է լրջագույն սպառնալիք արցախահայության համար, իսկ հայ ժողովրդին կանգնեցնելու է Արցախը վերջականապես կորցնելու փաստի առջև, ինչը անդառնալի հետևանքներ է ունենալու նաև հայոց պետականության ապագայի համար։
--00—ԼՄ