Մակրոնն աջակցել է ՆԱՏՕ-ին անդամակցելու Շվեդիայի որոշմանը

ԵՐԵՎԱՆ, ՄԱՅԻՍԻ 16, 24News

Մակրոն նոր ժամկետ նախագահություն

Ֆրանսիայի նախագահ Էմանուել Մակրոնը լիարժեք աջակցում է Շվեդիայի՝ ՆԱՏՕ-ին անդամակցելու որոշմանը: Ինչպես հաղորդում է «Արմենպրես»-ը, վկայակոչելով «ՌԻԱ Նովոստի»-ն, այս մասին հայտնում է Ելիսեյան պալատը:

Մայիսի 15-ին Շվեդիայի իշխող Սոցիալ-դեմոկրատական կուսակցությունը հայտարարել է, որ մտադիր է ՆԱՏՕ-ին անդամակցելու հայտ ներկայացնել: Շվեդիայի վարչապետ Մագդալենա Անդերսոնը նշել է, որ ՆԱՏՕ-ին անդամակցելը դրական ազդեցություն կունենա երկրի և շվեդ ժողովրդի անվտանգության վրա։

«Հանրապետության նախագահը կողմ է Շվեդիայի՝ ՆԱՏՕ-ին անդամակցելու սուվերեն որոշմանը»,-ասվում է հաղորդագրության տեքստում:

Ավելի վաղ Մակրոնն աջակցել էր Ֆինլանդիայի՝ ՆԱՏՕ-ին անդամակցելու որոշմանը: ԶԼՄ-ների տվյալներով՝ Շվեդիայի կառավարությունն արդեն պատրաստել է ՆԱՏՕ-ին անդամակցելու նամակ-հայտը: Այն նախատեսվում է ուղարկել Ֆինլանդիայի հայտի հետ միաժամանակ:

--00--ԱՀ