ԵՐԵՎԱՆ, ՄԱՅԻՍԻ 19, 24News
Հունաստանի արտաքին գործերի նախարար Նիկոս Դենդիասը պնդում է, որ Հունաստանը հակասության մեջ չէ Թուրքիայի հետ։
Նա այս մասին շեշտել է Հունաստանում հեռարձակվող «Star TV»-ին տված հարցազրույցում՝ պատասխանելով Ամերիկայի Միացյալ Նահանգներից (ԱՄՆ) Թուրքիայի՝ F-16 կործանիչներ գնելու հեռանկարի մասին հարցին։
«Հունաստանը Թուրքիայի հետ հակասության մեջ չէ։ Սակայն պարզ մի բան է ասում․ Եթե Թուրքիան սպառազինության այս համակարգն ունենա, պետք է հստակ երաշխիք լինի, որ Թուրքիան այդ զենքերը Հունաստանի դեմ չի օգտագործելու»,-նշել է նա։
Հունաստանի արտգործնախարարն ընդգծել է, որ եթե առժամանակ անց այդ համակարգերը սպառնալու են իրենց, ապա Հունաստանը, այնքանով, որքանով իրեն խոսք է հասնում, չի կարող հավանություն տալ, որ այդ համակարգերը տրամադրվեն Թուրքիային, կամ էլ առկա համակարգերն արդիականացվեն։
Դենդիասը նաև նշել է, որ Աթենքը չի ակնկալում, որ ԱՄՆ-ն դառնա Թուրքիայի թշնամին կամ Թուրքիային հեռացնի ՆԱՏՕ-ից՝ հավելելով, որ ԱՄՆ-ից միջազգային իրավունքի և ծովային իրավունքի հարցում են հստակ դիրքորոշում ակնկալում։
--00--ԿԿ