Տեղի ունեցավ Գևորգյան հոգևոր ճեմարանի ուսումնական տարվա փակումը․ ճեմարանն ավարտեց 24 սան

ԵՐԵՎԱՆ, ՀՈՒԼԻՍԻ 1, 24News

հասարակական

Հունիսի 30-ին, նախագահությամբ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի, Գևորգյան հոգևոր ճեմարանի հանդիսությունների դահլիճում տեղի ունեցավ ճեմարանի` 2021-2022 ուսումնական տարվա փակման հանդիսությունը:

Միջոցառումը բացվեց միասնական Տերունական աղոթքով, որից հետո հնչեցին ՀՀ և Գևորգյան հոգևոր ճեմարանի օրհներգերը:

Ներկաներին  իր ողջույնի խոսքը հղեց Գևորգյան հոգևոր ճեմարանի տեսուչ Հոգեշնորհ Տ. Շահե ծայրագույն վարդապետ Անանյանը: Հայր Սուրբը, շնորհակալություն հայտնելով Վեհափառ Հայրապետին ճեմարանի և ճեմարանի սաների հանդեպ մշտական ու հետևողական հայրական խնամքի և հոգածության, ինչպես նաև Գևորգյան հոգևոր ճեմարանի և Սևանի Վազգենյան հոգևոր դպրանոցի, Քահանայից պատրաստման լսարանի տեսչական անձնակազմերին և դասախոսներին կատարված կարևոր աշխատանքի ու ներդրման համար, ընդգծեց, որ ճեմարանի ամավերջյան հանդիսությունը յուրահատուկ և ավանդաբար փոխանցված մի ձև է ամփոփելու անցնող տարվա ձեռքբերումները և հույսի վճռական աչքերով նայելու եկող ուսումնական տարվա հեռանկարներին ու հնարավորություններին։

«Փառք երկնավոր Տիրոջը, որ այսօր կարող ենք արձանագրել․ ճեմարանն անցնող ուս. տարվա ընթացքում հաղթահարեց բոլոր դժվարությունները՝ վերագտնելով իր բնականոն ընթացքը։ Դարերով ամրագրված ու բազում վայրիվերումներով անցած, հոգևոր համակեցության և դաստիարակության վրա հենված ճեմարանական կրթության շարունակականությունը լավագույն երաշխիքն է քահանայական սուրբ կոչման հասունացման համար։ Այդ փորձառությունը, որպես հոգևոր ապրումի և գիտելիքի օրինակելի համադրում, անցյալում պահպանել և դրա վրա գուրգուրացել են մեր հերոսական ու փառապանծ նախնիները։ Ճեմարանը, ճեմարանական կրթությունն ու կյանքը, ճեմարանում դասավանդելու բարձր և պատասխանատու առաքելությունը նրանք շատ հաճախ ընկալել են որպես աղոթասացություն, սաղմոսասացություն, սրբազան գործ», -նշեց Հայր Շահեն՝ հավելելով, որ ճեմարանում ուսանելն ու դասավանդելը հարատև, սրբազան ու համբերատար գործընթաց է՝ լի ամենատարբեր դժվարություններով, շատ հաճախ հուսահատական պահերով, բայց այդ երկար գործընթացը պսակվում է հոգևորական դառնալու և հոգևորական դաստիարակելու հաստատուն պատրաստակամությամբ, Փրկչին, Նրա հիմնած եկեղեցուն և ազգին ծառայելու անմնացորդ նվիրումի գիտակցությամբ։

Այնուհետև  հոգևոր և ազգային երգերի կատարումներով հանդես եկավ Գևորգյան հոգևոր ճեմարանի երգչախումբը։ Ճեմարանի 5-րդ լսարանի սան Սեյրան սարկավագ Վահրադյանն ասմունքեց Կոստան Զարյանի «Մեր Հայրենիքիը» բանաստեղծությունը: Ուսանողության անունից խոսք ասաց ավարտական 6-րդ լսարանի սան Բարեշնորհ Նարեկ սարկավագ Գասպարյանը։

Հանդիսության ընթացքում կատարվեց նաև նվիրաբաշխություն: Ամենայն Հայոց Կաթողիկոսի ձեռամբ ուսման մեջ բարձր առաջադիմության և կարգապահության համար պարգևների արժանացան Գևորգյան հոգևոր ճեմարանի, Սևանի Վազգենյան հոգևոր դպրանոցի և Քահանայից պատրաստման լսարանի  ուսանողները:

Ցերեկույթի վերջում ներկաներին իր հայրական պատգամն ու օրհնությունը բերեց նաև  Ամենայն Հայոց Հայրապետը:

«Հայաստանյայց Առաքելական Սուրբ Եկեղեցու հոգևոր-կրթական բարձրագույն հաստատությունները սնուցող անոթներն են Հայոց Եկեղեցու հոգեփրկչական առաքելության, դարբնոցները մեր Սուրբ Եկեղեցու լուսավոր ապագայի, երաշխավոր կաճառները նրա սրբազան ժառանգության։ Գևորգյան հոգևոր ճեմարանը՝ իբրև մայր կրթարան, շուրջ մեկ ու կես դար սրբազան առաքելություն է իրականացնում ազգային-եկեղեցական մեր կյանքում։ Այս հաստատությանն է վստահված հավատավոր, նվիրյալ, ծառայասեր հայ հոգևորականի կերտումը, ազգանվեր հոգևոր առաջնորդների դաստիարակությունը»,-ասաց Նորին Սրբությունը և հավելեց, որ հայրենիքի ու Եկեղեցու առջև ծառացած նորօրյա մարտահրավերները պահանջում են, որպեսզի Հայ Եկեղեցու հոգևոր սպասավորները գործեն առկա հրամայականներին համարժեք և կիրառեն ժամանակի ընծայած բոլոր միջոցները՝ բազմարդյուն դարձնելու Եկեղեցու տերունապատվեր առաքելությունը։

Նորին Սրբությունը կարևոր նկատեց ազգային-քրիստոնեական արժեհամակարգի ամրապնդումը և ազգային, հայեցի կրթության առավել զորացումը:

«Այս ամենը ուղեգծում է նաև, թե հոգեփրկչական առաքելության ծիրից ներս ինչպիսի՛ն պետք է լինի Հայոց Եկեղեցու հովվական ծառայությունը առաջիկա տարիներին։ Այս համատեքստում կարևոր է մեր հոգևոր-կրթական հաստատությունների դերակատարությունը՝ իրավիճակի պահանջներին համարժեք հոգևորականների պատրաստության գործում։ Հատկապես առանձնահատուկ ուշադրություն պետք է դարձվի հովվական, հոգեխնամ և քարոզչական առաքելության հմտությունների զարգացմանը, նախաձեռնողական ոգուն,  կազմակերպչական ունակություններին, որպեսզի հոգևորականաց հոգեշահ ծառայությամբ զորանան մեր ժողովրդի արժեքային ընկալումները, ազգային գիտակցությունը և  պատասխանատվությունն ու լավատեսությունը վաղվա օրվա նկատմամբ»,- ընդգծեց Ամենայն Հայոց Կաթողիկոսը։

Անդրադառնալով մերօրյա հոգևոր հովիվների առաքելությանը՝ Վեհափառ Հայրապետն ի մասնավորի ընդգծեց.  «Եկեղեցականն այսօր պետք է լինի Աստծո պատվիրանների օրինակելի իրագործողը, սփոփողը որդեկորույս ընտանիքի, օգնականը կեղծ արժեքներից շփոթահար երիտասարդի, աջակիցը կարիքի մեջ գտնվողի, քաջալերողը վհատված զինվորի և hոգևոր խորհրդատուն, հարկ եղած դեպքում՝ նաև հանդիմանողը հասարակական-քաղաքական կյանքում անարդարության դրսևորումների, որպեսզի նորոգվի ու բարելավվի կյանքը»:

Դիմելով ճեմարանի դասախոսական անձնակազմին՝ Նորին Սրբություն թելադրեց, որ հոգևորականների նոր սերունդ պատրաստելու ճանապարհին ջանադիր աշխատանքով գիտելիքներ և իմացություն մատուցելու հետ մեկտեղ շարունակեն սաներին կոփել ու ձևավորել հոգևոր նկարագրով ու ազգային գիտակցությամբ, ոգեշնչեն եկեղեցական մեծ գործիչների օրինակով՝ զորացնելով նրանց հոգիներում հավատն առ Աստված, նվիրումը Հայ Եկեղեցուն և սերն առ ազգն ու հայրենին։

Ամավերջյան փակման հանդիսության առիթով Գարեգին Երկրորդ Հայրապետն իր գնահատանքը հայտնեց տեսչական անձնակազմին ու նրանց զորավիգ սպասավորներին՝ մաղթելով, որ Տիրոջ օրհնությամբ առավել արդյունավորվի նրանց պատասխանատու ծառայությունը։

Նորին Սրբությունը նաև իր բարեմաղթանքն ու օրհնությունը բերեց ճեմարանի սաներին՝ աղոթելով, որ Բարին Աստված ուսումնառության ընթացքում առավել լուսավորի նրանց միտքն ու հոգին և հաստատուն պահի հոգևոր կոչման և նախանձախնդիր՝ ծառայանվիրումի մեջ։

«Մեծ է Մեր սպասումը ձեզանից, սիրելի ճեմարանականներ։ Գործունեության ընդարձակ անդաստան կա, ուր կարիքն ունենք բազում նվիրյալ ու նախանձախնդիր նոր մշակների»,- նշեց Հայոց Հայրապետը՝ մաղթելով, որ Տիրոջ օրհնությամբ հոգևոր կրթական հաստատությունների հունձքը միշտ բարեբեր և առատ լինի հայ ժողովրդի հոգևոր-ազգային կյանքի պայծառության համար։

 Հանդիսությունը եզրափակվեց Նորին Սրբության «Պահպանիչ» աղոթքով:

2021-222 ուսումնական տարում ճեմարանն ավարտեց 24 սան:

--00--ՏՏ