ԵՐԵՎԱՆ, ՓԵՏՐՎԱՐԻ 6, 24News
Ակնհայտ է, որ տնտեսական խնդիրների մեջ գտնվող Թուրքիայի համար երկրաշարժը մեծ հարված էր, այն կարող է ազդել քարոզարշավի բնույթի վրա, զոհերի թիվը 1000-ից ավելի է և բնականոն քարոզարշավ իրականացնելը դժվար է: Այս մասին 24TV-ի հաղորդման ժամանակ ասաց ԵՊՀ արևելագիտության ֆակուլտետի դեկան, թուրքագետ Ռուբեն Մելքոնյանը:
Մելքոնյանի խոսքով, երկրաշարժի հետևանքով պատմական հայաբնակ տարածքներ, եկեղեցիներ, հուշարձաններ և բերդեր են վնասվել, երբ շոկը անցնի, հնարավոր է մշակութային օջախների վերականգնման փուլ սկսվի և հայկական հուշարձանները ևս ընդգրկվեն վերանորոգման ցուցակներում Թուրքիայի տոլեռանդությունը ևս մեկ անգամ ապացուցելու և քարոզչություն իրականացնելու համար։
Անդրադառնալով մայիսի 14-ին Թուրքիայում սպասվող ընտրություններին՝ թուրքագետը նշեց, որ քարոզարշավի մոտենալուն զուգընթաց իշխող ուժի կողմից հակաարևմտյան բացահայտ վիրավորանքները մեծ թափ են ստանում, քանի որ որոշ ընդդիմադիր լիդերներ Արևմուտքի հետ ջերմ հարաբերություններ ունեն և Արևմուտքը փորձում է ընդդիմությանը բացահայտ աջակցել:
«Այս ընտրությունը էրդողանի համար իր կարիերայի ամենակարևոր քաղաքական ճակատամարտն է, նա իր գործունեության պիկին է հասել: Թուրքիայի Հանրապետության հիմնադրման 100 ամյակն է, բայց կարևոր է ոչ միայն թվային սիմվոլիկան, այլ նաև` Թուրքիան փոխում է իր նկարագիրը: Այս ընտրություններով պետք է ամրագրվի, որ 2002 թվականից իշխող Էրդողանն ինքն է Թուրքիայի պետության ոճի հեղինակը, սա էրդողանական Թուրքիա է, ոչ թե Քեմալ Աթաթուրքի ստեղծած, և իր նպատակին հասնելու համար Էրդողանը կգնա ցանկացած քայլի»,- նկատեց Մելքոնյանը: Մանրամասները՝ տեսանյութում: Հերմինե Միքայելյան
Հերմինե Միքայելյան
--00—ԱՊ