Հենրիխ Մխիթարյանը Ադրբեջանի վիզա ստանալու հարցում կստանա ՈՒԵՖԱ-ի լիակատար աջակցությունը

ԵՐԵՎԱՆ, ԱՊՐԻԼԻ 16, 24News

1

Հայաստանի ֆուտբոլի ազգային հավաքականի ավագ և անգլիական «Արսենալ»-ի կիսապաշտպան Հենրիխ Մխիթարյանը Ադրբեջանի վիզա ստանալու հարցում կստանա ՈՒԵՖԱ-ի լիակատար աջակցությունը, եթե «Արսենալ»-ը կարողանա դուրս գալ Եվրոպայի լիգայի խաղարկության եզրափակիչ:

Այս մասին հայտնում է ESPN-ը՝ վկայակոչելով իր աղբյուրները: 

Նշվում է, որ «Արսենալ»-ը Եվրոպայի լիգայի խաղարկության ¼ եզրափակիչ փուլում դիմակայում է «Նապոլի»-ին: Լոնդոնում կայացած առաջին խաղում «Արսենալ»-ը 2:0 հաշվով պարտության է մատնել իտալական ակումբին:

Եվրոպայի լիգայի եզրափակիչ փուլը կայանալու է Ադրբեջանի մայրաքաղաք Բաքվում: Նշվում է, որ եթե «Արսենալ»-ը Եվրոպայի եզրափակչի ուղեգիր նվաճի, ապա «Արսենալ»-ը կանգնելու է Մխիթարյանի՝ Ադրբեջանում խաղալու խնդրի առաջ, քանի որ այդ երկիրն արգելում է Հայաստանի քաղաքացիների մուտքը:

Կայքը հիշեցնում է, որ Հենրիխ Մխիթարյանն անցած տարի դուրս է մնացել «Արսենալ»-ի հայտացուցակից ադրբեջանական «Ղարաբաղ» ակումբի դեմ խաղում, որը կայացել է Բաքվում: Հենրիխ Մխիթարյանը բաց է թողել նաև 2015 թվականին  Բաքվում կայացած «Քաբալա»-«Բորուսիա Դորտմունդ» խաղը, քանի որ գերմանական ակումբը որոշում էր կայացրել անվտանգության նկատառումներից ելնելով ֆուտբոլիստին Բաքու չտանել: