ԵՐԵՎԱՆ, ԱՊՐԻԼ 24, 24News
ԱԺ կրթության, գիտության, մշակույթի, սփյուռքի, սպորտի և երիտասարդության հարցերի մշտական հանձնաժոովի նախագահ Մխիթար Հայրապետյանն այսօր երկու արտագնա հանդիպում է ունեցել։
Պատգամավորը, նախ, այցելել է Մատենադարան, որտեղ հանդիպել է տնօրեն Վահան Տեր-Ղևոնդյանի հետ։ Կողմերը զրուցել են իրականացվող աշխատանքների, Մատենադարանի կարիքների՝ կոնկրետ մասնագետների պատրաստման, վերապատրաստման, առավել մեծ թվով զբոսաշրջիկներ ներգրավելու մասին, քննարկել հնարավոր համագործակցության տարբերակները։
Զրույցից հետո Հայրապետյանը ծանոթացել է Մատենադարանի՝ վերականգնման բաժնի աշխատանքներին, շրջայց կատարել գիտական մասնաշենքում՝ արխիվում և ընթերցասրահում։
Մատենադարանից հետո Մ․ Հայրապետյանն այցելել է Հայ Եկեղեցու Համաշխարհային Երիտասարդական Միավորման կենտրոնական գրասենյակ։
Շուրջ երեք ժամ տևած հանդիպման ընթացքում ՀԵՀԵՄ հոգևոր տեսուչ և Կենտրոնական գրասենյակի տնօրեն Տ. Թովմա վարդապետ Խաչատրյանի հետ քննարկել են աշխարհասփյուռ հայ երիտասարդներին ազգային և հոգևոր կյանքում ներգրավելու հնարավորությունները, անդրադարձել ազգային, պետական և եկեղեցական տարբեր հարցերի, կարևորել ավանդական արժեքների պահպանումը։