Զոհրաբ Մնացականյանը՝ Փաշինյան-Ալիև հաջորդ հանդիպման ժամկետների և վայրի մասին

ԵՐԵՎԱՆԱՊՐԻԼԻ 24, 24News

Ալիև

Հայաստանի և Ադրբեջանի ղեկավարների հաջորդ հանդիպման տեղի, ժամկետի մասին կհայտարարվի, երբ հանդիպման շուրջ լինի բոլոր կողմերի համաձայնությունը: Ծիծեռնակաբերդում լրագրողների հետ զրույցում այս մասին նշեց ՀՀ արտաքին գործերի նախարար Զոհրաբ Մնացականյանը՝ պատասխանելով լրագրողների այն հարցին, թե, ըստ Բաքվից եկած տեղեկությունների, Փաշինյանի, Ալիևի հաջորդ հանդիպումը նախատեսված է Վաշինգտոնում:

«Մոսկվայում վերջին հանդիպմանը քննարկել ենք, թե հաջորդ քայլն ինչ է լինելու և, մոտավորապես, ուրվագծել ենք, թե որտեղ, ինչպես և երբ կարող է լինել հաջորդ հանդիպումը: Մենք քննարկել ենք, հանդիպումից հետո յուրաքանչյուրը պետք է տեսնի, թե ինչպես է հնարավոր ֆիքսել այդ ժամկետները, որից հետո կհայտարարենք: Գիտեք, որ հանդիպումներ են տեղի ունենում  տարբեր մայրաքաղաքներում, ներառյալ համանախագահ երկրների մայրաքաղաքներում: Ճիշտ է, որ բոլորս միասին պայմանավորվենք, նոր հայտարարենք, ինչպես որ արել ենք»,- ասել է նախարարը:

Հարցին՝ Ռուսաստանի առաջարկներով տարբերա՞կն է հիմա բանակցային սեղանին, Զոհրաբ Մնացականյանն ասել է, որ հայտարարության մեջ եղածն արտահայտում է այն, ինչ քննարկվել է:

«Լրացուցիչ մեկնաբանության կարիք չեմ ունեցել անելու, որովհետև ամենն արտահայտված է փաստաթղթում, որի շուրջ միասին համաձայնության ենք եկել: Մենք քննարկել ենք կողմերի տարբեր մոտեցումները և դիրքորոշումները, սա փաստ է, բայց որևէ փաստաթուղթ այս փուլում չենք քննարկել»,-ասել է Մնացականյանը: