ԵՐԵՎԱՆ, ՄԱՅԻՍԻ 7, 24News
Ազգային ժողովի «Իմ քայլը» խմբակցության պատգամավոր, ԱԺ արտաքին հարաբերությունների մշտական հանձնաժողովի նախագահ Ռուբեն Ռուբինյանը չի կարծում, թե գլխավոր դատախազին ուղղված Արցախի գործող նախագահ Բակո Սահակյանի և նախկին նախագահ Արկադի Ղուկասյանի դիմում-խնդրանքը որևէ կապ ունի քաղաքականության հետ։
«Կարծում եմ՝ ես չէ, որ պետք է գնահատական տամ։ Նշված անձինք դիմել են գլխավոր դատախազին, պատասխանը դատախազի տիրույթում է։ Ես կարծում եմ, որ այստեղ քաղաքականությունն ընդհանրապես որևէ կապ չունի։ Պարոն Սահակյանը և պարոն Ղուկասյանը դիմել են դատախազին, հետևաբար, խնդիրը իրավական դաշտում է»,- լրագրողների հետ ճեպազրույցի ժամանակ ասել է Ռուբեն Ռուբինյանը։
Հիշեցնենք, որ այսօր Արցախի գործող ու նախկին նախագահները դիմել են Գլխավոր դատախազ Արթուր Դավթյանին՝ խնդրելով փոխել ՀՀ 2-րդ նախագահ, Արցախի նախկին նախագահ Ռոբերտ Քոչարյանի խափանման միջոց կալանքը։