ԵՐԵՎԱՆ, ՀՈՒՆԻՍԻ 20, 24News
Կառավարությունը դրական եզրակացություն է տվել ԱԺ «Լուսավոր Հայաստան» խմբակցության պատգամավոր Արման Բաբաջանյանի և «Իմ քայլը» խմբակցության պատգամավոր Ռուբեն Ռուբինյանի հեղինակած օրենսդրական նախագծին:
«Առաջարկվում է քաղաքական նշանակումների թիվը սահմանափակել՝ դարձնելով դեսպանների ընդհանուր թվի 15 տոկոսի չափ, իսկ կարիերային դեսպաններին որպես պարտադիր նախապայման առաջարկվում է աշխատանքային ստաժ` նախաձեռնությամբ 15 տարի էր առաջարկվում, իսկ կառավարությունն առաջարկվում է 10 տարի ժամկետով: Այն դեպքերում, երբ դեսպանի քաղաքական նշանակում է առաջարկվում կառավարության կողմից, ԱԺ արտաքին հարաբերությունների հանձնաժողովին իրավունք է վերապահվում ներկայացնել խորհրդակցական կարծիք»,-կառավարության նիստը ժամանակ հարցը ներկայացնելիս ասել է նախարարի տեղակալ Գրիգոր Հովհաննիսյանը:
ՀՀ վարչապետ Նիկոլ Փաշինյանը, արձագանքելով թեմային, անհասկանալի է համարել՝ ինչպես է ներկայացվելու խորհրդակցական կարծիքը:
«Դա նշանակում է, որ վարչապետը իր մտադրության մասին պետք է տեղյակ պահի հանձնաժողովի՞ն»,-ասել է Փաշինյանը և նշել, որ սա պետք է քննարկել, որ իրավական ճիշտ լուծում տրվի:
«Նվազեցնելով քաղաքական նշանակումների թիվը` հասցնելով 15 տոկոսի, հնարավորություն ենք ընձեռում կառավարությանը մանդատի ընթացքում ընդհանուր դեսպանների 7-8 քաղաքական նշանակում իրականացնել»,-ասել է փոխնախարարը, ի պատասխան՝ վարչապետն արձագանքել է․
«Դուք ովքե՞ր եք, որ այդ հնարավորությունը տալիս եք: Կներեք, տպավորություն էր, որ կառավարությանը շնորհակալություն պետք է հայտնի, որ այդ հնարավորությունը տալիս եք:
Եթե մի մարդ 10 տարի աշխատել է որպես նախարար, պատգամավոր, ԱԺ նախագահ, իրեն դեսպան նշանակելիս պետք է հանձնաժողովը կարծիք տա՞, իսկ մարդը, որը 10 տարի աշխատել է, օրինակ, դեսպանատան կցորդ, իր դեպքում ասում ենք, որ հանձնաժողովը քեզ հարցեր չունի՞»:
Փոխվարչապետ Տիգրան Ավինյանը նշել է, որ թյուրըմբռնում կա, քանի որ բոլորին էր առաջարկվում գնալ հանձնաժողով: Վարչապետը նշել է, որ ինքն է նախաձեռնել քաղաքական նշանակումների դրույթը սահմանափակել, բալանսավորել, բայց այստեղ խտրական մոտեցում է առաջանում:
«Այսինքն՝ հակառակ դիսկրիմինացիան ենք անում, և ստացվում է՝ բաժանում ենք առաջին և երկրորդ սորտի դեսպանների և դեսպանության թեկնածուների»,-ասել է Ավինյանը: Վարչապետը նշել է, որ այն կարծիքին չէ, որ 10 տարվա աշխատանքային ստաժը լուծում է խնդիրները:
«Այս ընթացքում բազմաթիվ աղաղակող կոպիտ թերություններ եմ տեսել, ես այդ մասին խոսել եմ նախարարների հետ: Ինչ-որ կաստայական կառուցվածքներ են ձևավորվում»,-ասել է վարչապետը և առաջարկել հեղինակների հետ կրկին քննարկել հարցը:
Կառավարությունը, սակայն, որոշման նախագծին դրական եզրակացություն է տվել և ուղարկել Ազգային ժողով։