ԵՐԵՎԱՆ, ՀՈՒՆԻՍԻ 27, 24New
92 տարեկան հասակում կյանքից հեռացել է պատմական գիտությունների դոկտոր, պրոֆեսոր, տեղեկատվության միջազգային ակադեմիայի ակադեմիկոս Ստեփան Ստեփանյանը: «Արմենպրես»-ին այս մասին հայտնեց նրա որդին:
Ստեփան Ստեփանյանը ծնվել է 1927 թվականի նոյեմբերի 20-ին, Արթիկի շրջանի Արթիկ քաղաքում: 1950-1976 թվականներին աշխատել է ՀԿԿ Կենտկոմում որպես դասախոս, ապա՝ դասախոսական խմբի ղեկավար։ 1965 թվականին Մոսկվայում ավարտել է ասպիրանտուրան: Աշխատել է գերմանական արխիվներում ու գրադարաններում, որոնցում հայտնաբերած փաստաթղթերի ու նյութերի հիման վրա գրել ու հրապարակել է մի շարք աշխատություններ, աշխարհին է ներկայացրել Հայոց ցեղասպանության հակամարդկային էությունը:
Հեղինակել է շուրջ 22 գիրք և ավելի քան 500 գիտական ու հրապարակախոսական հոդվածներ, որոնք հրապարակվել են տարբեր լեզուներով: Հայերի ցեղասպանության ճանաչման գործում Ստեփանյանի կարևոր ներդրումներից մեկն այն է, որ նա Ռուսաստանի Պետական դումայի համար պատրաստել է Հայոց ցեղասպանության վերաբերյալ փաստաթղթերի ամբողջ փաթեթը, որի հիման վրա Պետական դուման 1995 թվականին ընդունել է «Հայտարարություն 1915-1922 թվականներին հայ ժողովրդի ցեղասպանության դատապարտման մասին»:
Նա պարգևատրվել է «Պատվո նշան» շքանշանով, Գերմանական Դեմոկրատական Հանրապետության Խաղաղության Խորհրդի մեդալով, Ս. Վավիլովի անվան մեդալով, ՀՀ նախագահի պատվոգրով, Հայոց ցեղասպանության 90-րդ տարելիցի միջոցառումների կազմակերպման պետական հանձնաժողովի «Ցեղասպանագիտության մեջ ձեռք բերած վաստակի համար» մեդալով: