ԵՐԵՎԱՆ, ՀՈՒLԻՍԻ 2, 24News
Կոտայքի մարզպետ Ռոմանոս Պետրոսյանը ֆեյսբուքյան էջում անդրադարձել է «Իմ քայլը» խմբակցության պատգամավոր Սասուն Միքայելյանի՝ իր հասցեին արված հայտարարություններին, և ասել է, որ ցավում է, բայց Սասուն Միքայլեյանն ազնիվ չէ նախ ինքն իր հանդեպ և իր իսկ անցած ուղու, ապա նաեւ՝ Ռոմանոս Պետրոսյանի նկատմամբ, և անմնացորդ նվիրումի՝ հանդեպ մեր «ընդհանուր» գործին։
Ռոմանոս Պետրոսյանը նաեւ նշել է. «Դե իսկ հավատարմության մասին՝ առ հեղափոխության նպատակներն ու դրա արժեքները՝ ես կլռեմ:
Աստված է բոլորիս դատավորը. ժամանակն իր գնահատականը կտա։
Մեկ անգամ չէ, որ ասել եմ՝ ինձ համար գոյություն չունեն հեղինակություններ. իմ հավատամքը Հայաստանի Հանրապետությունն է, իսկ ես կամ եւ մնալու եմ մեր պետականության, օրենքի գերակայության պետության եւ իրավահավասարության հասարակության անխոնջ զինվորը։
Հ.Գ. Լրատվամիջոցների մեր հարգարժան գործընկերներին ներողություն եմ հայտնում հարյուրից ավելի զանգերն անպատասխան թողնելու համար եւ խնդրում եմ՝ երեկվա հետ կապված հարցադրումներ չանել. այլեւս ոչ մի դիտարկում չեմ անելու, միայն գործելու եմ, եւ գործելու եմ ինչպես միշտ՝ բացառապես հանուն Հայաստանի Հանրապետության եւ նրա Քաղաքացու»: