ԵՐԵՎԱՆ, ՕԳՈՍՏՈՍ 6, 24News
Ռուսական «Պոբեդա» ավիաընկերությունը կշարունակի իրականացնել չվերթները դեպի Հայաստան՝ Գյումրի, եթե «Շիրակ» օդանավակայանից ստանա հստակ երաշխիքներ՝ վառելիքի թերլիցքավորման խնդրի վերացման վերաբերյալ:
«Արմենպրես»-ի հետ զրույցում՝ այս մասին ասաց «Պոբեդա» ընկերության գլխավոր գրասենյակի մամուլի քարտուղար Ելենա Սելիվանովան:
««Պոբեդան»-ն կշարունակի չվերթներն իրականացնել նաև թերլիցքավորված վառելիքի արժեքի փոխհատուցման դեպքում։ Այս պահին չկա նման պայմանավորվածություն: Վառելիքի թերլիցքավորումն անվտանգության լուրջ սպառնալիք է: Պատկերացրեք, եթե թռիչքի ընթացքում արտակարգ իրավիճակ ստեղծվի վառելիքի անբավարարության հետևանքով: Մենք ակնկալում ենք վառելիքի հստակ նշված ծավալ կոնկրետ երթուղու համար»,- նշեց Սելիվանովան։
Նրա խոսքով՝ այս պահին մինչև ամառային սեզոնի վերջը «Պոբեդան» կկատարի իր ծրագրած չվերթները դեպի Գյումրի, որպեսզի իր հաճախորդներին դժվար դրության մեջ չդնի: Ձմեռային սեզոնից այս ուղղությամբ տոմսերի վաճառքը դադարեցված է:
Լոուքոսթերը Գյումրի չվերթները սկսել էր իրականացնել 2016 թվականի դեկտեմբերից: