ԵՐԵՎԱՆ, ՕԳՈՍՏՈՍԻ 15, 24News
Բովադակային առումով հայոց պատմության դասագրքի մասով քննարկումներ կան, լրագրողների հետ զրույցում ասաց ՀՀ կրթության, գիտության, մշակույթի և սպորտի նախարար Արայիկ Հարությունյանը:
«Շատ բարդ քննարկումներ են, հանձնաժողովը չի կարողանում եզրակացության գալ, որոշ մասնագետներ 180 աստիճանով այլ բաներ են գրում այդ նյութերում», - նկատեց նա:
Արդյո՞ք անհամաձայնությունները կապ ունեն մարտի 1-ի դեպքերի ներկայացման հետ, նախարարը պատասխանեց.
«Ե՛վ մարտի 1-ի, և՛ ընտրությունների հետ կապված, և՛ քաղաքական գնահատականների հետ կապված»:
Նախարարն ասաց, որ դասագրքերի բովանդակային մասով չի կարող տեղեկություն հայտնել, բայց հաստատեց, որ բովանդակությունն այլ կերպ շարադրելու խնդիր կա․
«Կա այդպիսի խնդիր: Ես թույլ չեմ տվել առայժմ դասագրքերի տպագրումը, քանի դեռ հանձնաժողովը չի եկել որոշակի եզրակացության»:
Հարությունյանը հավելեց՝ քանի դեռ մարտի 1-ի գործով քրեական գործը շարունակվում է, դա ևս խնդիրներ է առաջացնում այդ թեման գրքերում շարադրելու համար․
«Մենք ուսումնասիրում ենք մի շարք երկրների փորձը: Կան երկրներ, որոնք վերջին 20-25 տարիների իրենց պատմական դրվագները չեն ներառում դասագրքերի մեջ: ՀՀ-ն էլ կարող է կիրառել այդ փորձը»։