ԵՐԵՎԱՆ, ՕԳՈՍՏՈՍԻ 20, 24News
Ռիո դե Ժանեյրոյում զինված տղամարդը գրավել է ուղեւորներով ավտոբուսը։ Դեռևս հայտնի չէ, թե քանի մարդ է պատանդ վերցվել։ Այս մասին հայտնում է Correio Braziliense պարբերականը:
Միջադեպը տեղի է ունեցել երեքշաբթի առավոտյան Ռիո Նիտերոյ կամրջի վրա: Ռիո դե Ժանեյրոյի քաղաքապետարանի ուղղությամբ կամրջով երթեւեկությունն ամբողջությամբ արգելափակված է:
Նախնական տեղեկություններով՝ ավտոբուսը գրավողը ներկայացել է որպես ռազմական ոստիկանության սպա: Նա ավտոբուսի վարորդից պահանջել է փոխադրամիջոցը կանգնեցնել եւ սպառնում է ավտոբուսի մեջ բենզին լցնել:
Հաղորդվում է, որ 4 մարդ ազատ է արձակվել, բայց դեռևս հայտնի չէ, թե ավտոբուսի մեջ քանի մարդ է մնացել:
Իրավապահները տղամարդու հետ բանակցություններ են վարում: Դեպքի վայր են ժամանել նաև հատուկջոկատայիններ: