ԵՐԵՎԱՆ, ՍԵՊՏԵՄԲԵՐ 16, 24News
Խորհրդարանն ընդունեց «Բարգավաճ Հայաստան» խմբակցության պատգամավոր Նաիրա Զոհրաբյանի ու նրա մյուս կուսակիցների ներկայացրած կենդանիների նկատմամբ բռնությունը քրեականացնող օրինագիծը. Կողմ էր 74 պատգամավոր, դեմ՝ 11, ձեռնպահ՝ 17։
Պատգամավորները փոփոխություններ էին կատարել ՀՀ Քրեական և վարչական իրավախախտումների մասին օրենսգրքերում։
Նրանք առաջարկում են Քրեական օրենսգրքում լրացում կատարել և ավելացնել հոդված՝ «Կենդանու նկատմամբ դաժան վերաբերմունքը» անվանումով։ Այդպիսով, տնային և անտուն կենդանու նկատմամբ դաժան վերաբերմունքի (խեղելու, մասնատելու, թունավորելու, փորձարկելու, ողջ վիճակում անդամահատումը, մաշկահանումը, կենդանուն բարձրությունից նետելը, մարտերի կազմակերպումն ու անցկացումը) համար սահմանվում է տուգանք՝ նվազագույն աշխատավարձի 100-ապատիկից 300-ապատիկի չափով կամ կալանքով՝ 1-3 ամիս ժամկետով կամ՝ ազատազրկմամբ՝ առավելագույնը 1 տարի ժամկետով։
Իսկ նույն արարքը, որը կատարվել է մի խումբ անձանց կողմից նախնական համաձայնությամբ ու առանձնակի դաժանությամբ, պատժվում է նվազագույն աշխատավարձի 300-ապատիկից 500-ապատիկի չափով կամ կալանքով՝ 1-3 տարի ժամկետով։
Օրինագծերով սահմանվում են նաև տնային կենդանիները։ Դրանք տնային պայմաններում պահվող կենդանիներն են։