ԵՐԵՎԱՆ, ՍԵՊՏԵՄԲԵՐԻ 23, 24News
«Վայոց Ձորում տեղի ունեցած միջադեպի հետևանքով տուժած փոխգնդապետ Արա Մխիթարյանի վիճակը շարունակում է մնալ ծայրահեղ ծանր»,- այս մասին 24News-ի հետ զրույցում նշեց ՊՆ մամուլի խոսնակ Արծրուն Հովհաննիսյանը։
«Մուրացան» զինվորական հոսպիտալի պետի` բուժգծով տեղակալ Կարեն Գրիգորյանը լրատվամիջոցների հետ զրույցում նշել էր, որ փոխգնդապետը հոսպիտալ է տեղափոխվել փակ գանգուղեղային վնասվածքով, արյունազեղման բավականին մեծ օջախով և ուղեղի աջ կիսագնդի տեղաշարժով` անգիտակից վիճակում։ Վերականգնվելու հույսերը, ըստ բժշկի, շատ քիչ են:
Այլ մանրամասներ դեռ հայտնի չեն, ընթանում է դատաբժշկական փորձաքննություն:
Հիշեցնենք, որ սեպտեմբերի 18-ին Վայոց Ձորում տեղի է ունեցել ծեծկռտուք, որին մասնակցել է մարզպետ Տրդատ Սարգսյանի օգնական Հարություն Գրիգորյանը և ՀՀ ԶՈՒ սպաներ։ Տեղի ունեցածի արդյունքում փոխգնդապետ Արա Մխիթարյանը ստացել է ծանր մարմնական վնասվածք, իսկ Գրիգորյանը ձերբակալվել է։ Ըստ լրատվամիջոցների, ծեծկռտուքին մասնակցել է նաև Տրդատ Սարգսյանը, սակայն վերջինս կտրականապես հերքել էր այդ լուրերը։