ԵՐԵՎԱՆ, ՍԵՊՏԵՄԲԵՐԻ 24, 24News
ՀՀ պաշտպանության նախարար Դավիթ Տոնոյանը զերծ մնաց Վայոց Ձորում սպային մարմնական վնասվածք պատճառելու դեպքի վերաբերյալ նախաքննության փուլում որևէ արտահայտություն անելուց: Սեպտեմբերի 24-ին լրագրողների հետ զրույցում Տոնոյանը նշեց, որ իրենք հետևողական են լինելու, որ արդարությունն ապահովված լինի:
«Նախաքննության այս փուլում որևէ արտահայտություն, մասնավորապես, Պաշտպանության նախարարի կողմից, շատ սխալ կլինի: Մենք շատ հետևողական ենք լինելու, որ ամեն ինչ պարզվի մինչև վերջ, և դատաքննության, նախաքննության փուլերում արդարությունն ու ազնվությունը պետք է ապահովված լինի»,- ասաց Տոնոյանը:
Հիշեցնենք, որ սեպտեմբերի 18-ին Վայոց Ձորում տեղի է ունեցել ծեծկռտուք, որին մասնակցել է մարզպետ Տրդատ Սարգսյանի օգնական Հարություն Գրիգորյանը և ՀՀ ԶՈՒ սպաներ։ Տեղի ունեցածի արդյունքում փոխգնդապետ Արա Մխիթարյանը ստացել է ծանր մարմնական վնասվածք, իսկ Գրիգորյանը ձերբակալվել է։ Ըստ լրատվամիջոցների, ծեծկռտուքին մասնակցել է նաև Տրդատ Սարգսյանը, սակայն վերջինս կտրականապես հերքել էր այդ լուրերը։