ԵՐԵՎԱՆ, ՍԵՊՏԵՄԲԵՐԻ 25, 24News
Օդի աղտոտվածության և անդրսահմանային ազդեցության խնդիրներն են քննարկվել Շրջակա միջավայրի նախարարության և ՄԱԿ-ի Եվրոպական տնտեսական հանձնաժողովի համատեղ կազմակերպած աշխատաժողովի ժամանակ: Միջոցառմանը մասնակցել են պետական, գիտական ու միջազգային կազմակերպությունների ներկայացուցիչներ և փորձագետներ։
Ինչպես տեղեկացրին ՀՀ շրջակա միջավայրի նախարարության տեղեկատվության և հասարակայնության հետ կապերի բաժնից, շրջակա միջավայրի նախարարի տեղակալ Իրինա Ղափլանյանը ներկայացրել է շրջակա միջավայրի կայուն կառավարման և օդի աղտոտվածության նվազեցման ուղղությամբ Հայաստանում իրականացվող աշխատանքները։ ՄԱԿ-ի մշտական համակարգող Շոմբի Շարփն անդրադարձել է օդի աղտոտվածության խնդիրների լուծմանն ուղղված միջազգային համագործակցությանը և ընթացիկ գործողություններին։
Միջոցառման մասնակիցներին ներկայացվել է «Մեծ հեռավորությունների վրա օդի անդրսահմանային աղտոտվածության մասին» կոնվենցիայի երեք արձանագրության վավերացման Հայաստանի Ազգային գործողությունների ծրագիրը։
Աշխատաժողովի մասնակիցները քննարկել են նաև օդի որակի կառավարման ազգային քաղաքականությանը, մոնիթորինգի համակարգի կատարելագործմանը վերաբերող հարցեր։