ԵՐԵՎԱՆ, ՍԵՊՏԵՄԲԵՐԻ 26, 24News
ԱԺ «Իմ քայլը» խմբակցության պատգամավորներ Վարազդատ Կարապետյանի, Նարեկ Զեյնալյանի և Բաբկեն Թունյանի հեղինակած «Պետական նպաստների մասին» Հայաստանի Հանրապետության օրենքում լրացումներ կատարելու մասին օրենքի նախագծով առաջարկվում է նվազագույն աշխատավարձի չափը՝ 55 հազար դրամի փոխարեն սահմանել 63 հազար դրամ:
«Մեր առաջարկից հետո կառավարությունը հանդես եկավ այլ առաջարկով՝ 63 հազար դրամի փոխարեն նվազագույն աշխատավարձը դարձնել 68 հազար դրամ», - ԱԺ առողջապահության և սոցիալական հարցերի մշտական հարցերի հանձնաժողովի նիստում ասաց Վարազդատ Կարապետյանը:
Հարցով հարակից զեկուցող ՀՀ աշխատանքի և սոցիալական հարցերի նախարարի տեղակալ Արմեն Ուդումյանը նշեց, որ ուժի մեջ մտնելու դեպքում օրենքը կգործի 2020 թվականից.
«Ստացվում է, որ հինգ տարի արդեն նվազագույն աշխատավարձի բարձրացում չենք ունեցել», - ասաց նա:
Նախագծի հեղինակներից Բաբկեն Թունյանը նկատեց, որ իրենք սահմանել են 63 հազար դրամ, ոչ թե 68 հազար, որովհետև 68 հազարի ժամանակ բազային աշխատավարձի խնդիր է առաջանում.
«Որքանո՞վ է 68 հազարն ընդունելի բիզնեսի համար, և պետբյուջեի լրացուցիչ ծախսն ինչքա՞ն է կազմելու», - հետաքրքրվեց Թունյանը:
Ուդումյանն ասաց, որ 68 հազար դրամի դեպքում, պետբյուջեի վրա բեռը կկազմի շուրջ 9 մլրդ 734 մլն 400 հազար դրամ, իսկ 63-ի դեպում՝ 7 մլրդ 366 մլն 809 հազար դրամ՝ նշելով, որ նվազագույն աշխատավարձի բարձրացումը բերելու է միջին աշխատավարձի աճի: