ԵՐԵՎԱՆ, ՀՈԿՏԵՄԲԵՐԻ 14, 24News
Քրդական Firat գործակալությունը, հղում անելով քրդական ինքնավարության ներկայացուցիչների հայտարարությանը, հայտնում է, որ քրդական խմբավորումները համաձայնության են եկել Սիրիայի իշխանության հետ թուրք-սիրիական սահմանին կառավարական զորքեր տեղակայելու գործում:
Ըստ աղբյուրի՝ սիրիական իշխանությունների հետ համաձայնություն է ձեռք բերվել, որի նպատակն է դիմակայել Թուրքիայի ագրեսիային: Սիրիացի զինվորականները կտեղակայվեն սահմանի երկայնքով, որպեսզի աջակցեն քուրդ մարտիկներով համալրված «Սիրիայի ժողովրդավարական ուժերին»։
«Սիրիայի հյուսիս ներխուժած թուրքական զորքերը վերջին 5 օրերին բազմաթիվ հանցագործություններ են կատարել քաղաքացիական բնակչության դեմ: Ագրեսորներին համատեղ հակահարված տալու համար համաձայնության ենք եկել սիրիական կառավարության հետ, որ պետք է պաշտպանության տակ վերցնի ազգային ինքնիշխանությունն ու սահմանը»,- նշվում է հայտարարության մեջ:
Հիշեցնենք, որ հոկտեմբերի 9-ին Թուրքիայի նախագահ Էրդողանը հայտարարել էր, որ Սիրիայի հյուսիս-արևելյան շրջանում «Խաղաղության աղբյուր» անունով ռազմարշավ է սկսում։
Հայտարարությունից հետո թուրքական զինուժի գործողությունները դատապարտեցին բազմաթիվ երկրներ, այդ թվում՝ ԵՄ անդամ բոլոր երկրները՝ հանդես գալով ռազմարշավը դադարեցնելու համատեղ կոչով: Իսկ Ֆրանսիան, Գերմանիան, Ֆինլանդիան և Նիդեռլանդները հայտարարել են, որ կասեցնում են Թուրքիային զենքի մատակարարումը։