Մեկնարկել է Հայ-ռուսական 5-րդ առողջապահական համաժողովը

ԵՐԵՎԱՆ, ՀՈԿՏԵՄԲԵՐԻ 21, 24News

1

Հայ-ռուսական 5-րդ առողջապահական համաժողովն իր դռներն է բացել Հայաստանի և Ռուսաստանի բժշկական հանրության առջև: Միջոցառմանը մասնակցելու նպատակով Հայաստան է ժամանել Ռուսաստանի Դաշնության առողջապահության նախարարի տեղակալ Տատյանա Սեմյոնովայի գլխավորած պատվիրակությունը:

Ինչպես  տեղեկացրին ՀՀ առողջապահության նախարարության հասարակայնության հետ կապերի բաժնից, համաժողովը բացել է նախարար Արսեն Թորոսյանը: Ողջունելով ներկաներին` նախարարը նշել է, որ Ռուսաստանի Դաշնության գործընկերների հետ ցանկացած հանդիպում նոր հնարավորություններ է ստեղծում առողջապահության համակարգի զարգացման համար:

«Ուրախ եմ փաստել, որ մենք առաջընթաց ենք արձանագրել մասնագիտական համագործակցության շրջանակներում և տարբեր ոլորտներում գործնական բժշկության և բժշկական գիտությունների փոխանակման շրջանակներում»,- ասել է Հայաստանի առողջապահության պատասխանատուն: Ապա Արսեն Թորոսյանը թվարկել է վերջին մեկ տարվա ընթացքում ոլորտի ձեռքբերումներն ու բարեփոխումները մեր երկրում:

Համաժողովի շրջանակներում կողմերը քննարկել են առողջապահության բնագավառի ներկայիս մարտահրավերները, խնդիրները, փոխանակվել են իրենց ձեռքբերումներով և փորձով, ինչպես նաև անդրադարձել այս և փոխադարձ հետաքրքրություն ներկայացնող այլ ուղղություններով համագործակցության հեռանկարներին:

Այնուհետև Ռուսաստանի Դաշնության պատվիրակությունը Արսեն Թորոսյանի ուղեկցությամբ այցելել է «Էրեբունի» բժշկական կենտրոն, որտեղ ներկայացվել է Հայաստանում ինսուլտի բուժման պետական ծրագիրն ու սանիտարական ավիացիայի ծառայությունը:

«Առաջին հայ-ռուսական առողջապահական համաժողովը տեղի է ունեցել  2014 թվականին Երևանում: Այնուհետև 2015, 2017 և 2018 թվականներին պարբերաբար կայացել են Մոսկվայում և Երևանում:

Վերջիններիս ընթացքում կողմերը ստորագրել են մի քանի փոխըմբռնման հուշագրեր և համատեղ հայտարարություններ, որոնց շրջանակներում համագործակցություն է ծավալվել առողջապության և բժշկագիտւթյան մի շարք ուղղություններով:

Միաժամանակ, այս համաժողովները հարթակ են հայ և ռուս բժիշկների ու գիտնականների համար` հանդիպելու և քննարկելու առողջապահական և բժշկագիտական մի շարք հարցեր»,- նշված է հաղորդագրության մեջ: