ԵՐԵՎԱՆ, ՆՈՅԵՄԲԵՐԻ 8, 24News
«Ռուսաստանի արտգործնախարար Սերգեյ Լավրովը Երևան կատարելիք իր պաշտոնական այցի ընթացքում Հայաստանի ղեկավարության հետ կքննարկի ղարաբաղյան հիմնախնդիրը»,- հայտարարել է Ռուսաստանի արտգործնախարարության խոսնակ Մարիա Զախարովան` շաբաթօրյա ճեպազրույցի ժամանակ: Այս մասին հաղորդում է ՏԱՍՍ-ը։
Նրա ասելով՝ այցի ընթացքում Լավրովը հանդիպումներ կունենա հանրապետության վարչապետի և նախագահի, ինչպես նաև արտգործնախարարի հետ:
«Բանակցությունների ընթացքում արտգործնախարարը կքննարկի երկկողմ համագործակցության հարցերի լայն շրջանակ՝ ԵՏՄ-ի, ՀԱՊԿ-ի, ԱՊՀ-ի միջև համագործակցությունը, ՄԱԿ-ում, ԵԱՀԿ-ում, ԵԽ-ում, ՍԾՏՀ-ում և այլ միջազգային ֆորումներում դիրքորոշումների կոորդինացիան: Կողմերի ուշադրության առանցքում կլինեն նաև տարածաշրջանային անվտանգության խնդիրները, ներառյալ՝ ղարաբաղյան կարգավորման հեռանկարները», - հայտարարել է Զախարովան:
Նա նաև նշել է, որ կողմերը նախատեսում են երկու երկրների արտաքին գործերի նախարարությունների միջև ստորագրել խորհրդակցությունների նախագծեր՝ 2020-2012 թվականների համար:
Լավրովի այցը տեղի կունենա նոյեմբերի 10-11-ը: