ԵՐԵՎԱՆ, ՆՈՅԵՄԲԵՐԻ 8, 24News
«Մեկ Հայաստան» կուսակցության նախագահ Արթուր Ղազինյանն իր ֆեյսբուքյան էջում գրառում է արել։
««Կովկասը» աշխարհագրական տարածք է, որը գտնվում է Եվրոպայի և Ասիայի հատման մասում: Կովկասյան լեռնաշղթան Կովկասը բաժանում է երկու մասի. հյուսիսային և հարավային:
Այս տարածքում բնակվում են մի քանի տասնյակ ազգություններ և էթնիկ խմբեր, քրիստոնյաներ, մահմեդականներ, կրոնական տարբեր խմբեր:
«Կովկասցի» ազգ կամ էթնոս գոյություն չունի, և մեզ, հայերիս, «կովկասցի» որակելը վիրավորում է մեր էթնիկ, կրոնական և մշակութային ինքնությունը:
Մենք, հայերս, հայտնվել ենք Կովկասում պատմական տարբեր շրջափուլերում տեղի ունեցած ռազմական, քաղաքական և տնտեսական գործընթացների հետևանքով: Պատմագրությունը փաստում է, որ Կովկասը դա պատմական Հայաստանի միայն մի մասն է՝ Փոքր Հայքը, մինչդեռ Հայկական ինքությունը ձևավորվել և զարգացել է եվրոպական քաղաքակրթության հիմքի վրա, որն իր հերթին, հիմնված է քրիստոնեական ուսմունքների և արժեքային համակարգի վրա:
Խնդրում եմ մեր բարձրաստիճան պաշտոնյաներին ձեռնպահ մնալ նման որակումներից և աշխատել չխոսել երևույթներից և ոլորտներից, որոնց մասին չունեն համալիր գիտելիքներ և խորքային պատկերացում», - գրել է Ղազինյանը։