ԵՐԵՎԱՆ, ՆՈՅԵՄԲԵՐԻ 15, 24News
Հանրային խորհրդի նախկին նախագահ Վազգեն Մանուկյանը նոյեմբերի 15-ին, լրագրողների հետ զրույցում հայտնեց, որ գարնանը կվերականգնի ԱԺՄ կուսակցությունը, համագումար կանցկացվի, և ինքը կմտնի քաղաքական դաշտ։
Վազգեն Մանուկյանը տեղեկացրեց, որ իրենք «Վերնատուն» ակումբի համաժողովին մասնակցելու հրավեր ուղարկել են նաև ԱԺ՝ «Իմ քայլը» և «Լուսավոր Հայաստան» խմբակցություններին։
Նշենք, որ այսօր Երեւանում «Վերնատուն» հասարակական–քաղաքական ակումբը համաժողով էր կազմակերպել, որտեղ նախատեսվում է քննարկել հետեւյալ հարցերը.
• Լեռնային Ղարաբաղի հակամարտության բանակցային գործընթացը մտնում է փակուղի՝ մեծացնելով պատերազմի վտանգը (ի՞նչ անել),
• հանրության այս աստիճան պառակտումը ազգային անվտանգության սպառնալիք է (ինչպե՞ս հաղթահարել),
• դատաիրավական համակարգը, Սահմանադրական դատարանը ենթարկվում են բիրտ ճնշումների, փորձ է արվում օրենսդիր և գործադիր իշխանությունների վրա հաստատված անձնիշխանությունը տարածել նաև իշխանության այս ճյուղի վրա, ինչը հակասում է իրավական-ժողովրդավարական պետության սկզբունքներին։
Համաժողովին պաշտոնապես հրավիրվել են քաղաքական ուժերի, քաղաքացիական հասարակության ու փորձագիտական շրջանակների ներկայացուցիչներ։