Կատար մուտքի արտոնագրի պահանջը ՀՀ քաղաքացիների համար կչեղարկվի

ԵՐԵՎԱՆ, ՆՈՅԵՄԲԵՐԻ 19, 24News

քայլ

Կատարի Պետության էմիրի դիվանում   այսօր՝ նոյեմբերի 19-ին,  տեղի է ունեցել պաշտոնական այցով Կատարի Պետությունում գտնվող Հայաստանի Հանրապետության նախագահ Արմեն Սարգսյանի եւ Կատարի Պետության էմիր Թամիմ բին Համադ Ալ Թանիի առանձնազրույցը։

Բարի գալուստ մաղթելով Հայաստանի Հանրապետության նախագահին եւ ընդգծելով իրենց անձնական գերազանց փոխհարաբերությունները՝   էմիր Թամիմ բին Համադ Ալ Թանին շնորհավորել է Կատարում Հայաստանի  դեսպանության բացման առթիվ, նշելով, որ մեր երկրները հրաշալի հարաբերություններ ունեն։

Նախագահ Սարգսյանը շնորհակալություն է հայտնել  էմիրին Հայաստանի Հանրապետության քաղաքացիների համար Կատար մուտքի արտոնագրի պահանջի չեղարկման, ինչպես նաեւ Կատարի Պետությունում Հայաստանի Հանրապետության դեսպանության բացմանը ցուցաբերած  գործուն աջակցության համար։  Նախագահը վստահություն է հայտնել, որ մուտքի արտոնագրերի պահանջի  չեղարկումը դրական կազդի տնտեսական, մշակութային, գիտական, կրթական եւ հատկապես զբոսաշրջային կապերի հետագա խթանման վրա։