ԵՐԵՎԱՆ, ՆՈՅԵՄԲԵՐԻ 22, 24News
ՌԴ անվտանգության դաշնային ծառայությունը ձերբակալել է «Իսլամական ազատագրական կուսակցություն» ահաբեկչական խմբավորման 9 անդամի, այդ թվում՝ 2 ղեկավարի: Այս մասին հաղորդում է «РИА Новости»-ն՝ հղում անելով ծառայության հասարակայնության հետ կապերի կենտրոնին:
Նշվում է, որ հատուկ գործողությունն անցկացվել է Մոսկվայում, Թաթարստանում և Տյումենի մարզում:
Հատուկ ծառայության տվյալներով՝ ձերբակալվածները մարզերում ահաբեկչական փակ կառույցներ են ստեղծել, տարածել իրենց գաղափարախոսությունը, փորձել են հավաքագրել տեղի մահմեդականներին:
«Կառույցի անդամները ծավալում էին հակասահմանադրական գործունեություն, որը հիմնված է, այսպես կոչված, համաշխարհային խալիֆայության ստեղծման դոկտրինի, աշխարհիկ հասարակության ինստիտուտների կործանման ու ներկայիս իշխանությունը բռնի ուժով տապալելու վրա»,- ասվում է հաղորդագրության մեջ:
Առգրավվել են քարոզչական նյութեր, կապի և տեղեկատվության տարածման միջոցներ ու կրիչներ:
Հարուցվել է քրեական գործ: