ԵՐԵՎԱՆ, ԴԵԿՏԵՄԲԵՐԻ 11, 24News
Միացյալ Նահանգների նախագահ Դոնալդ Թրամփը Twitter-ի իր միկրոբլուգում Ռուսաստանի Դաշնության արտգործնախարար Սերգեյ Լավրովի հետ համատեղ լուսանկար է հրապարակել՝ արված Սպիտակ տան օվալաձև աշխատասենյակում:
Թրամփը Twitter-ում նաև գրել է. «Շատ լավ հանդիպում անցկացրի արտգործնախարար Սերգեյ Լավրովի և Ռուսաստանի մյուս ներկայացուցիչների հետ: Քննարկեցինք բազմաթիվ հարցեր, այդ թվում՝ առևտուրը, Իրանը, Հյուսիսային Կորեան, միջուկային համաձայնագիրը, միջուկային զենքի վերահսկումը և ընտրություններին միջամտությունը: Անհամբեր սպասում եմ մոտ ապագայում այս երկխոսության շարունակմանը»:
Ըստ Սպիտակ տան պաշտոնական հայտարարության նախագահ Թրամփը ՌԴ ԱԳՆ ղեկավարին նախազգուշացրել է՝ Ռուսաստանը պետք է զերծ մնա ամերիկյան ընտրություններում որևէ միջամտությունից, ինչպես նաև Մոսկվային կոչ է արել լուծել Ուկրաինայի հետ հակամարտությունը:
Լավրովի այցը Սպիտակ տուն տևել է մեկ ժամ։ Վերջին անգամ Թրամփը Սպիտակ տանը Լավրովին ընդունել էր 2017թ.:
Սերգեյ Լավրովը Դոնալդ Թրամփի հետ հանդիպման մասին ասել է, որ անցել Է փոխըմբռնման մթնոլորտում, քննարկել են մի շարք հանգուցային խնդիրներ։
«Մենք հասկանում ենք ԱՄՆ ներքին քաղաքականությունը, բայց երկուստեք շահագրգռություն կա աշխատելու այն ոլորտներում, որտեղ մենք կարող ենք արդյունքների հասնել»,- նշել Է նախարարը: