ԵՐԵՎԱՆ, ՓԵՏՐՎԱՐԻ 25, 24News
«Սբ. Աստվածամայր» ԲԿ-ի մամուլի խոսնակ Գևորգ Դերձյանն ֆեյսբուքյան էջում գրառում է արել՝ տեղեկացնելով, որ Տավուշում խոշոր վթարից տուժած 2 երեխաները տեղափոխվել են Երևան։
«Նախօրեին խոշոր վթար է տեղի ունեցել Տավուշի մարզում, որի հետևանքով 4 մարդ է մահացել, ևս 4-ը վիրավոր են: Նրանցից 2-ը տեղափոխվել են Երևան՝ «Սուրբ Աստվածամայր» բժշկական կենտրոն:
7 տարեկան աղջիկը ԲԿ է տեղափոխվել ռեանիմոբիլով, նրա մոտ առկա է փակ գանգուղեղային վնասվածք, գլխուղեղի սալջարդ, դիմային ոսկրերի կոտրվածք, ձախ սրունքի ոսկրերի կոտրվածք: Միացված է եղել արհեստական շնչառության սարք, այժմ շնչում է ինքնուրույն:
5 տարեկան տղան էլ «Սուրբ Աստվածամայր» ԲԿ է տեղափոխվել սանիտարական ուղղաթիռով: Երեխայի մոտ եղել է ներքին արյունահոսություն, որովայնի խոռոչում 500 մլ. արյուն: Ունի նաև աջ թոքի սալջարդ, եղել է շոկային վիճակում, որից դուրս գալուց հետո վիրահատվել է:
Երկուսի վիճակն էլ կայուն ծանր է, գտնվում են բժիշկների խիստ հսկողության տակ: Կտրվի հավելյալ տեղեկություն»,-նշվում է հաղորդագրությունում:
Նշենք, որ փետրվարի 24-ին Տավուշի մարզի Բերդ-Այգեձոր ավտոճանապարհին տեղի ունեցած վթարի հետևանքում զոհվել է 4 մարդ, կա 4 վիրավոր։