Մինչև մարտի 24-ը կսահմանափակվի նաև Իրանից Հայաստան բեռնատարների տեղաշարժը․ կառավարություն

ԵՐԵՎԱՆ, ՄԱՐՏԻ 3, 24News     

Իրան-Հայաստան

 

ՀՀ կառավարությունը որոշում է կայացրել Իրանի Իսլամական Հանրապետության հետ հաղորդակցության ժամանակավորապես սահմանափակումը երկարաձգել մինչև մարտի 24-ը։

«Հիմք ընդունելով «Նորմատիվ իրավական ակտերի մասին» Հայաստանի Հանրապետության օրենքի 34-րդ հոդվածը՝ Հայաստանի Հանրապետության կառավարությունը ո ր ո շ ու մ է.
1. Հայաստանի Հանրապետության կառավարության 2020 թվականի փետրվարի 24-ի «Իրանի Իսլամական Հանրապետության հետ հաղորդակցությունը ժամանակավորապես սահմանափակելու մասին» N 197-Ն որոշման 1-ին կետում կատարել հետևյալ փոփոխությունները և լրացումը՝
1) «Երկշաբաթյա ժամկետով» բառերը փոխարինել «Մինչև 2020 թվականի մարտի 24-ը ներառյալ» բառերով»,-ասված է կառավարության որոշման տեքստում։

Կառավարության որոշմամբ՝ կսահմանափակվի նաև բեռնատարների մուտքը Հայաստան։

Եթե կառավարության փետրվարի 24-ի որոշմամբ նախատեսվում էր  Իրանից Հայաստան մուտք գործած բեռնափոխադրումներ իրականացնող տրանսպորտային միջոցների (դրանց՝ Հայաստանի Հանրապետության քաղաքացի չհանդիսացող վարորդների) վերադարձն Իրանի Իսլամական Հանրապետություն», ապա այժմ կթույլատրվի միայն Վրաստանից վերադարձով բեռնափոխադրումներ իրականացնող տրանսպորտային միջոցի վերադարձը Իրան՝ ՀՀ տարածքով։

Հիշեցնենք, որ ՀՀ առողջապահության նախարար Արսեն Թորոսյանն ասել էր՝ անհրաժեշտություն է առաջացել վերանայել Իրանի Իսլամական Հանրապետության հետ հաղորդակցությունը ժամանակավորապես սահմանափակելու մասին որոշում։ Այդ մասին ֆեյսբուքյան ուղիղ եթերում ասել է առողջապահության նախարար Արսեն Թորոսյանը, ապա հավելել, որ Իրանի հետ սահմանին գործող երկշաբաթյա սահմանափակումը կերկարաձգվի մինչև 2020 թվականի մարտի 24-ը ներառյալ։

«Սահմանափակումը կտարածվի նաև Իրանից Հայաստան և Հայաստանից Իրան բեռնափոխադրումներ իրականացնող տրանսպորտային միջոցների նկատմամբ»,-ասել է  Թորոսյանը։