ԵՐԵՎԱՆ, ՄԱՐՏԻ 19, 24News
Հաշվի առնելով նոր կորոնավիրուսի վարակի տարածման կանխարգելման անհրաժեշտությունը՝ ավագանու խմբակցությունների հետ խորհրդակցելուց հետո Երևանի քաղաքապետի որոշմամբ ավագանու հերթական նիստն անցկացվեց ավագանու նիստերի դահլիճի տարածքից դուրս՝ քաղաքապետարանի ճեմասրահում: Նիստի համար ապահովված էին տեխնիկական անհրաժեշտ պայմաններն ու հակահամաճարակային համապատասխան միջոցառումները:
Մինչ օրակարգային հարցերին անցնելը քաղաքապետ Մարությանը շնորհակալություն հայտնեց բժիշկներին «առաջին գծում» աշխատելու և իրենց մասնագիտական պարտքը կատարելու համար, ինչպես նաև ավագանու անդամներին ու քաղաքապետարանի, վարչական շրջանների և համայնքային ենթակայության բոլոր այն ստորաբաժանումների աշխատակիցներին, ովքեր այս օրերին շարունակում են կատարել իրենց մասնագիտական պարտականությունները:
«Քաղաքապետարանը շարունակում է աշխատել 24/7 ռեժիմով: Կային տարբեր կարծիքներ՝ անցկացնել նիստը, թե չանցկացնել. կյանքը շարունակվում է, պետությունը պետք է գործի և եթե մենք ընտրել ենք համայնքային ծառայողի աշխատանքը, ապա պետք է գիտակցենք, որ պետք է աշխատենք նաև արտակարգ դրությունների ժամանակ»,- նշել է քաղաքապետը:
Ավագանին հավանություն տվեց Երևանի զարգացման 2019 թվականի ծրագրի իրականացման, ինչպես նաև բյուջեի կատարման հաշվետվության մասին որոշման նախագծերին: Դրանք, ի դեպ, ներկայացված են եղել հանրային քննարկման՝ հանրային բաց լսումների եղանակով:
Երևանի ավագանու միաձայն որոշմամբ փոփոխություններ կատարվեց նաև Երևան քաղաքի 2020 թվականի բյուջեում: Համաձայն փոփոխությունների՝ աշխատանքներ կտարվեն վերելակների փոխարինման, ոռոգման նոր ցանցի կառուցման, հետիոտնային անցումների կառուցման ու վերանորոգման, կանաչապատման աշխատանքների համար 14 անուն 69 մեքենասարքավորումներ և աղբի տեսակավորման սարքավորումներ ձեռք բերելու և քաղաքային տնտեսության մի շարք այլ ոլորտներում:
Երևանի ավագանու հաջորդ՝ հերթական նիստը կգումարվի ապրիլի 28-ին: